मंगलबार, जेठ ४ २०७८ | Tue, May 18, 2021
नेपालको समय: ०१:१६ | UK Time: 20:31

रेडिङका सांसदसंग नेपालीकाे अन्तरक्रिया 

वीनेपाली
२०७४ वैशाख १८ गते १०:४३
लन्डन । बेलायतको पूर्वी रेडिङबाट प्रतिनिधित्व गर्ने कन्जरभेटिभ पार्टीका सांसद रब विल्सनसंग आइतबार नेपालीले अन्तरक्रिया गरेका छन् । पाकिस्तानी सामुदायिक भवनमा यूकेको वर्तमान राजनीतिक परिस्थिति र नेपाली समुुदायका समस्या सम्बन्धमा गर्ने भनिएको अन्तरक्रिया विशेष कारणवश स्थगित भएपनि सांसदसंग चिरञ्जिवी पौडेलको निवासमा सानो छलफल भएको हो ।

उक्त छलफलमा सांसद विल्सनले वर्तमान राजनीतिक अवस्था र आगामी निर्वाचनमा कन्जरभेटिभ पार्टीको धारणाका बारेमा प्रकाश पार्दै आफू नेपाली समुदायको हितका लागि सकारात्मक भएको र सन् २००९ मा गोरखासंग सम्बन्धित प्रस्तावको पक्षमा मतदान गरेको भनाइ राखे । छलफलमा नेपालीले नेपाली समुदायको तर्फबाट खासगरी सामुदायिक भवनको अभावका कारण भोग्नुपरेका समस्या, स्वास्थ्य उपचारका लागि जनरल प्राक्टिसनर्स (जि पि) मा हुने ढिलाई, दक्ष एवं उच्च शिक्षा हासिल गरेर पनि उपयुक्त रोजगारी अभाव, भिषा निवेदनको फस्र्योटमा हुने ढिलाई र ब्रेक्जिटपछि उत्पन्न हुने परिस्थितिबाट नेपाली समुदायलाई पर्नसक्ने प्रभावका बारेमा जिज्ञासा राखेका थिए । सांसदले सामुदायिक भवनको खोजी र दक्ष जनशक्तिको रोजगार प्रवर्धनका लागि सक्दो सहयोग गर्ने प्रतिवद्धता व्यक्त गर्दैं अध्यागमन सम्बन्धी कुनै समस्या भए आंफूसंग सम्पर्क राख्न समेत अनुरोध गरे । साथै ब्रेक्जिट पश्चात् यूरोपियन आप्रवासीहरुको आगमनमा हुने कमीले नेपाली लगायत अन्य मुलुकका आप्रवासीहरुको लागि रोजगारी र अन्य सुविधामा झन् सहजता आउने धारणा विल्सनको थियो ।

उक्त छलफलमा चिरञ्जिवी पौड्याल, भरत पौड्याल, बाबुराम बास्तोला, कल्पना सुबेदी पण्डित, डा. गान्धी सुबेदी र सञ्जय शर्मा उपस्थिति थिए ।

प्रतिक्रिया

सम्बन्धित सामाग्री

फेसबुक