आयरल्याण्डका लागि नेपाली राजदूत सुवेदीले ओहोदाको प्रमाणपत्र पेश गरे

तस्विर सौजन्यः लन्डनस्थित नेपाली दूतावास

लन्डन । आयरल्याण्डका लागि नेपाली राजदूत डा. दुर्गाबहादुर सुवेदीले बिहीबार आयरल्याण्डका राष्ट्रपतिसमक्ष ओहोदाको प्रमाणपत्र पेश गरेका छन् ।

राजदूत डा. सुवेदीले डब्लिनस्थित राष्ट्रपतिय दरबारमा आयोजित एक विशेष समारोहबीच आयरल्याण्डका राष्ट्रपति माइकल डि हिगिन्स्समक्ष ओहोदाको प्रमाणपत्र पेश गरेका हुन् । डा. सुवेदी बेलायतका लागि नेपाली राजदूत समेत हुन् ।

उक्त अवसरमा राजदूत सुवेदीले नेपालकी राष्ट्रपति विद्यादेवी भण्डारी र प्रधानमन्त्री पुष्पकमल दाहाल ‘प्रचण्ड’ ले राष्ट्रपति हिगिन्ससमक्ष पठाएको शुभेच्छा र सुस्वास्थ अनि खुशीको सन्देश तथा आयरल्याण्डका जनताको शान्ति, प्रगति र समृद्धिको कामना सुनाएका थिए ।

ओहोदाको प्रमाणपत्र बुझेपछि राष्ट्रपति हिगिन्सले राजदूत सुवेदीलाई बधाइ दिंदै नेपालकी राष्ट्रपति र नेपाली जनताको सुख, समृद्धि र प्रगतिको शुभेच्छा व्यक्त गरेका थिए । हिगिन्सले सुवेदीलाई आफ्नो कार्यकालमा नेपाल र आयरल्याण्डबीच द्धिपक्षीय सम्वन्ध विस्तार गर्न सफलता मिलोस् भन्ने कामना समेत गरे ।

समारोहमा राजदूतले आयरल्याण्ड र नेपालबीचको सम्वन्ध अझ मजवुत बनाउने आफ्नो चाहना व्यक्त गर्दै नेपालको 
राजनीतिक, सामाजिक तथा आर्थिक विकास, नयां संविधान कार्यान्वयन र भूकम्पपछिको पुनर्निर्माणबारे अवगत गराएका थिए । राजदूत सुवेदीले महाभूकम्पको पीडाका बेला र नेपालको सामाजिक आर्थिक विकासमा आयरल्याण्डले गरेको सहयोग र साथप्रति आभार समेत व्यक्त गरेका थिए ।

उक्त अवसरमा आयरल्याण्ड सरकारका विशिष्ठ अधिकारीहरुको समेत उपस्थिति थियो ।

प्रतिक्रिया

सम्बन्धित सामाग्री