लन्डन । दुई हांस्यकलाकार र एक गायिका बुधबार सांझ लन्डन उत्रिएका छन् । बेलायतका विभिन्न शहरमा नयां वर्ष २०७४ शुभकामना सांझका लागि हांस्यकलाकारद्वय दमन रुपाखेती र पारवन राई (राई बुढा) एवं गायिका कला राई बेलायत आएका हुन् । सोही कार्यक्रमकै लागि गायिका विष्णु चेम्जोङ भने यसअघि नै बेलायत आइसकेकी छन् ।
बुधबार लन्डन उत्रिएका तीन कलाकारलाई स्वागत गर्न आयोजकहरु सुमन अधिकारी र उमेशराज मोक्तान एवं यती वरिष्ठ उपाध्यक्ष शशीधर नेपाल लगायत हिथ्रो विमानस्थल पुगेका थिए ।
पिस इन्टरटेनमेन्ट यूकेको निमन्त्रणामा चार कलाकार पहिलो पटक बेलायत आएका हुन् । हिथ्रोमा सञ्चारकर्मीसंग कुरा गर्दै कलाकारहरुले आफूहरुको पहिलो बेलायत भ्रमण सफल पारिदिन आग्रह गरे । कार्यक्रम अवधिभर दर्शकलाई हंसाउने र गीतमा नचाउने उनीहरुको प्रण छ । शुभकामना सांझ २१ अप्रिलमा अल्डरसट, २२ अप्रिलमा आसफोर्ड केन्ट र २३ अप्रिल सांझ लन्डन साउथ हयारोमा हुने आयोजकले बताएका छन् । झण्डै महिनादिनमा अन्य शहरमा समेत कार्यक्रम हुने जनाइएको छ ।
यती पूर्व अध्यक्ष उमेशराज मोक्तानले २३ अप्रिल आइतबार साउथहयारोस्थित हयारो बरो फुटबल क्लवमा एक्लै सांगीतिक कार्यक्रम गर्न लागेका हुन् । उनले लन्डनवासी नेपालीलाई कार्यक्रममा आएर मनोरन्जन लिन अनि नयां वर्ष शुभकामना आदानप्रदान गर्न अपिल गरेका छन् ।
तस्विरहरुः शिव भण्डारी
