स्विडेनमा ट्रक्र आक्रमणकारी उज्बेक वासिन्दा

स्टकहोम, २६ चैत । स्टकहोममा शुक्रबार ट्रक आक्रमण गरी चार व्यक्तिको हत्या गर्ने चालक ३९ वर्षीय उज्वेक मूल वासिन्दा भएको शनिबार पहिचान गरिएको छ र यी व्यक्ति पहिलेदेखि नै निरीक्षण घेरामा रहेको अधिकारीहरूले बताएका छन् ।

यसबीच स्विडेनका प्रधानमन्त्री स्टफान लफेनले नागरिकलाई यो पीडा सहन गर्न आग्रह गर्नुभएको छ भने स्थानीय वासिन्दासँग वार्ता गर्न उहाँ सडकमा निस्कनुभएको छ ।

स्विडेनको झण्डा शनिबार आधा झुकाइएको छ । घटनामा चार जनाको मृत्यु र १५ व्यक्ति घाइते भएका थिए । शुक्रबार अपरान्ह आक्रमणकारीले एक ट्रक अपहरण गरी बजारबीच भीडमा जोत्न पुगेका थिए । प्रधानमन्त्री लफेनले सोमबार एक मिनेटको मौनधारणका साथमा राष्ट्रिय शोक दिवस घोषणा गर्नुभएको छ ।

स्विडेनका प्रहरी प्रमुख डान एलियासनले शनिबार एक पत्रकार सम्मेलनमा अधिकारीहरूले आक्रमणकारीलाई पक्राउ गरेको विश्वास व्यक्त गर्नुभएको छ ।