खोटाङ सेवा समाज बेलायतले उपलब्ध गराएको एम्बुलेन्सलाई शनिबार दिक्तेलस्थित जिल्ला समन्वय समितिको कार्यालय परिसरमा स्वागत गर्दै जिल्लावासी । समाजले आर्थिक स सङ्कलन गरेर खरिद गरेको सात वटा एम्बुलेन्स र एक वटा भिडियो एक्स–रे (अल्ट्रासाउण्ड) खोटाङ जिल्लाका लागि उपलब्ध गराएको हो । तस्बिर ः केदार मगर, खोटाङ, रासस
लन्डन, २७ चैत । खोटाङ सेवा समाज बेलायतले जिल्लाका लागि सात वटा एम्बुलेन्स र एक अल्ट्रासाउन्ड मेसिन उपलब्ध गराएको छ ।
समाजले दुई वर्षसम्म अभियान सञ्चालन गरेर जम्मा गरेको रकमले खरिद गरेको एम्बुलेन्स र अल्ट्रासाउन्ड मेसिन शनिबार दिक्तेलमा एक कार्यक्रम गरी उपलब्ध गराएको हो ।
राससका अनुसार, जिल्लाका दुई प्राथमिक स्वास्थ्य केन्द्र र पाँच स्वास्थ्यचौकीलाई रु एक करोड १२ लाख ३१ हजारको एम्बुलेन्स प्रदान गरेको एम्बुलेन्स परियोजनाका सचिव टङ्क थापाले जानकारी दिए ।
समाजले जन्तेढुङ्गा गाउँपालिकामा पर्ने प्राथमिक स्वास्थ्य केन्द्र चिसापानी, ऐसेलुखर्क गाउँपालिकास्थित प्राथमिक स्वास्थ्य केन्द्र ऐसेलुखर्क, दिप्रुङ गाउँपालिकामा पर्ने डाँडागाउँ स्वास्थ्य चौकी, केपिलासगढी गाउँपालिकाको बाक्सिला स्वास्थ्यचौकी, रुपाकोट मझुवागढी नगरपालिकाको बुइपा स्वास्थ्यचौकी, रुपाकोट मझुवागढी नगरपालिकाकै निर्मलीडाँडा स्वास्थ्यचौकी र दक्षिणी क्षेत्रमा पर्ने खोटेहाङ गाउँपालिकाको सिम्पानी स्वास्थ्य चौकीलाई उपलब्ध गराएको हो ।
अस्पताल नै नपुगी जिल्लावासीले अकालमा ज्यान गुमाउनुपर्ने बाध्यता अन्त्य गर्नका लागि प्रतिगोटा रु ३२ लाख मूल्य पर्ने एम्बुलेन्स जुटाएर स्वास्थ्य संस्थालाई प्रदान गरिएको खोटाङ सेवा समाज युकेका अध्यक्ष अशोककुमार राईले बताए । ‘रोजगारीको सिलसिलामा अहिले युकेमा बसे पनि हामी खोटाङ्गे हौँ’, उनले भने, ‘खोटाङ्गेको समस्यालाई समाधान गर्न हाम्रो पनि उत्तिकै गहन जिम्मेवारी हुने भएकाले सहयोग गरेका हौँ ।’
समाजले एम्बुलेन्ससँगै जिल्ला अस्पताल दिक्तेललाई रु १४ लाख बराबरको एक थान अल्ट्रासाउन्ड इसिजी मेसिनलगायतका उपकरण प्रदान गरेको छ । बेलायत, अमेरिका, ब्रुनाई, जर्मनी, मलेसिया, सिङ्गापुर, नेपाललगायतका ठाउँमा बसोबास गर्ने चारसय ४५ खोटाङ्गेबाट प्राप्त स्वेच्छिक सहयोग रकमले खरिद गरेर एम्बुलेन्स तथा अस्पतालका लागि उपकरण प्रदान गरिएको समाजले जनाएको छ ।
एम्बुलेन्सको प्रतिवटा मूल्य रु ३२ लाख पर्ने भए पनि सरकारबाट प्राप्त भन्सार छुटका कारण प्रतिवटा रु १२ लाखमै भित्र्याइएको जनाइएको छ । समाजको सहयोगले खोटाङवासीले अब सुविधा सम्पन्न एम्बुलेन्स तथा सदरमुकाम दिक्तेलस्थित जिल्ला अस्पतालमै अल्ट्रासाउन्ड सेवा पाउने भएका छन् ।
विकट पहाडी भूगोल रहेको जिल्लामा राम्रो स्वास्थ्य सुविधा नहुँदा सामान्य रोगका लागि पनि राजधानीलगायत अन्य स्थानमा पुरयाउनुपर्ने बाध्यता छ । यसअघि जिल्लामा एम्बुलेन्स नहुँदा अधिकांश बिरामीलाई रु डेढ लाखसम्म खर्चेर हेलिकप्टरमार्फत राजधानी काठमाडौँलगायतका सहर पुरयाउनुपर्ने बाध्यता थियो ।
एम्बुलेन्स हस्तान्तरणका लागि समाजका आजीवन सदस्य, चन्दादाता एवं एनआरएनए यूके उपाध्यक्ष हिराधन राई दिक्तेल पुगेका थिए ।
