ग्रीनवीच कपको अन्तिम तयारी पुरा

लन्डन । नेपाली युथ असोसिएसनको आयोजनामा यही ८ अप्रिलका दिन ग्रीनवीच कप फुटबल र भलिबल प्रतियोगिता हुने भएको छ । उलवीचस्थित रोयल आर्टिलरी ब्यारेकको फुटबल मैदानमा सञ्चालन हुने प्रतियोगितामा १६ फुटबल टोली र १० भलिबल टोलीको सहभागिता रहने संस्थाका सभापति तथा संयोजक दिपेन गुरुङले जानकारी दिए । यो बेलायतमा अरु प्रतियोगिताभन्दा भिन्न तरिकाले गर्न लागिएको आयोजकको दाबी छ ।

प्रतियोगिताको विजेता टोलीले आकर्षक ट्रफी सहित १५०० पाउण्ड नगद प्राप्त गर्नेछ । असोसिएसनका उप सभापति लक्ष्मण गुरुङका अनुसार खेलाडीहरुको हौसला बढाउने उद्देश्यले क्वार्टर फाइनलिष्टहरुलाई समेत २०० पाउण्ड पुरस्कार दिइनेछ । गत वर्षको खेल मंगोलियन भान्जाले जितेको थियो भने २०१५ मा पनि भान्जाहरुकै वर्चश्व थियो ।

भलिबल प्रतियोगितामा रेडिङ भलिबल क्लबबाट कप्तान सन्तोष गुरुङ, अल्डरसट भलिबल क्लबबाट कप्तान हितमान आले, गत सालका बिजेता चाल्टन भलिबल क्लबबाट कप्तान वसन्त पौडेल, आयोजक ग्रीनवीच भलिबल क्लबका कप्तान हयारी गुरुङ, वीन्चेस्टर भलिबल क्लबका कप्तान कोष गुरुङ, तोङबा भलिबल क्लबका कप्तान मनोज गुरुङ, स्वीन्डन भलिबल क्लबका कप्तान बालबिक्रम शाही, अल्डरसट भलिबल क्लबका कप्तान चन्दन गुरुङ, वुद्ध फाउण्डेसन भलिबल क्लबका कप्तान विष्णु थापा र जमघट भलिबल क्लबका कप्तान शैलेन्द्र गुरुङले नेतृत्व 
गर्ने भएका छन् ।

उक्त प्रतियोगिताका लागि प्रमुख रेफ्री नेपालका लागि पूर्व अन्तर्राष्ट्रिय खेलाडी मिलन गुरुङले गर्ने भएका छन् ।

भलिबल खेलका संयोजक तथा नेपाली युथ असोसिएसन यूके उपसभापति राजन खकुरेलका अनुसार आयोजक समितिले तयारी अगाडि बढाइसकेको छ । भलिबल प्रतियोगिताको विजेता टोलीले आकर्षक ट्रफी सहित ६०० पाउण्ड नगद प्राप्त गर्नेछ ।

संस्थापक एवं निवर्तमान सभापति हयारी गुरुङले बेलायतमा ग्रीनवीच कपको छुटै पहिचान भएकाले सौहार्दपूर्ण तरिकाले प्रतियोगिता सम्पन्न गर्न सम्पूर्ण नयां कार्यसमितिलाई शुभकामना दिएका छन् ।

ग्रीनवीच कप सकिसकेपछि नेपाली युथ असोसिएसनको आयोजनामा लोटस क्लबमा म्यूजिक फेस्टिबल पनि हुंदैछ ।