यसरी हुंदैछ गोर्खा कपको तयारी

लन्डन । तमुधिं यूकेको तेश्रो कार्यकारिणी बैठक आइतबार सम्पन्न भएको छ । उक्त बैठक यही वर्ष मे २८ मा क्विन्स एभेन्यू, अल्डरसटमा हुन गइरहेको १५ औं गोर्खा कप फुटबल २०१७ बारे विस्तृत छलफलमा केन्द्रित रहयो । बैठकमा स्पोर्टस कोअर्डिनेटर क्याप्टेन पिताम्बर गुरुङ ले सम्पूर्ण तयारीबारे ब्रिफ गरेका थिए । उनले फुटबल प्रतियोगितामा नन भेट्रान र भेट्रान गरि क्रमशः ३२ र ८ टिमले भाग लिने जानकारी दिंदै अमेरिका र हङकङबाट समेत अन्तर्राष्ट्रिय टिम सहभागी गराउन पहल गरिएको बताए ।

बैठक अध्यक्षता गरिरहेका तमुधिं यूके अध्यक्ष ज्ञाम गुरुङले बेलायतमा नेपालीहरुको सबैभन्दा ठूलो इभेन्ट गोर्खा कप हेर्न 
१२ देखि १४ हजार दर्शक सहभागी हुने विश्वास व्यक्त गरे । ब्रिफिङका क्रममा अध्यक्षले कडा सुरक्षा, मेडिकल सुविधा 
एवं सबै खेल एउटै प्रागंणमा हुने अवगत गराए । बिजनेस कोअर्डिनेटर उपाध्यक्ष नन्द गुरुङले १० खाना स्टल र अन्य 
व्यापारिक स्टल साथै सोधपुछ, पत्रकार एवं लस्ट एन्ड फाउन्ड 
स्टल गरि ४० वटा रहने जानकारी दिए ।

गोर्खा कपमा आर्मी ब्यान्ड, प्याराजम्प, नेपाली नृत्य र यसपटक फुटबल सेलिब्रेटी टोटेन्हाम फुटबल क्लबका पूर्व क्याप्टेन लेड्ली किङ विशेष आकर्षणका रुपमा रहने बैठकमा जनाइयो ।

ट्राफिक इन्चार्ज हेमसायर इकाइका अध्यक्ष उत्तर गुरुङले आफ्नो टिमले विशेष ट्राफिक व्यवस्थाको तयारी गरेको जनाए । सुरक्षातर्फ लेफटिनेन्ट मुक्ति गुरुङको निगरानीमा ८० देखि १०० जना सेक्युरिटी तैनाथ गरिने र बर्दीका प्रहरीको पनि दिनभर प्याट्रोलिङ हुने जनाइएको छ ।

मौसमले साथ दिए उत्कृष्ट प्रदर्शन हुने जनाउंदै महासचिव कृष्ण गुरुङले अल्डरसटको दोश्रो ठूलो मेलाका रुपमा रसमुर बरो काउन्सिलले अत्यन्त चासोका साथ हेरेको बताए ।

१५० देखि १६० जना स्वयंसेवकका साथ खेलकुद गतिविधिमा संलग्न सबैलाई खाना एवं पानीको व्यवस्था गरिने आमा समूहकी अध्यक्ष प्रेमकुमारी गुरुङ र महासचिव यशोदा गुरुङले बताए ।

करिब २ सय जना विशेष अतिथी उपस्थित हुने लक्ष्य राखिएको यस इभेन्टमा भिआइपी तथा अन्य गन्यमान्य, संघसंस्थाका 
प्रतिनिधि, पत्रकार एवं स्थानीय व्यापारी, राजनीतिज्ञहरु तथा पाहुनाहरुलाई आतिथ्यबारे मेजर कृष्ण गुरुङले जानकारी दिए ।

बैठकमा मिडिया सेक्रेटेरी रोहित गुरुङले पत्रकार सम्मेलन र गोर्खा कप फुटबलमा पत्रकारहरुलाई निमन्त्रणा सम्वन्धमा जानकारी दिंदै प्रमुख सल्लाहकार डा. चन्द्र गुरुङले दिएको सल्लाह सुझाव मनन गरिने बताए ।

गोर्खा कपमा लाग्ने अनुमानित बजेटको रुपरेखा सम्वन्धमा स्पोर्टस कोअर्डिनेटर पिताम्बर गुरुङ र कोषाध्यक्ष दिपक गुरुङले जानकारी दिए । वातावरणमा विशेष ध्यान दिनुपर्नेमा जोड दिंदै फोहोर व्यवस्थापनको उपयुक्त व्यवस्था हुने र सम्पूर्ण आगन्तुकहरुलाई यथोचित स्थानमा फोहोर फाली दिएर सहयोग गर्न आव्हान गर्दै १३० वटा पोर्टेवल लुको व्यवस्था गर्न प्रायोजक खोजिने क्याप्टेन तीर्थमान गुरुङले बताए ।

बैठकमा खेलाडीहरु र खेल आचार संहिताबारे लेफ्टिनेन्ट कुसाङ गुरुङ र कुमार गुरुङले स्पष्ट पारेका थिए । गोर्खा कप हुने स्थलको लेआउटका लागि भौतिक व्यवस्थापन लैन्च गुरुङ र जुमकाजी गुरुङले गर्ने जनाइएको छ । बैठकमा आकर्षक पुरस्कारबारे क्याप्टेन पिताम्बर गुरुङले जानकारी दिए ।

अत्यन्त सौहाद्रपूर्ण वातावरणमा भएको उक्त बैठकमा सल्लाहकारहरुलाई स्वागत गर्दै तमुधिं यूकेका अध्यक्ष ज्ञाम गुरुङले शिव मन्दिर हेमसायरका नवनिर्वाचित अध्यक्ष रोहित गुरुङलाई फेटा र खादा लगाइ मन्दिर निर्माण प्रोजेक्टको सफलताको शुभकामना दिए । अन्तिममा अध्यक्ष गुरुङले उपस्थित सबैलाई धन्यवाद दिंदै बैठक समापन गरेका थिए ।

तस्विरः मिलन तमु