लिमा, १६ चैत्र । राजधानी लिमाबाट आन्तरिक उडान भर्दै पेरुको जुनिन प्रान्तको जाउजा विमानस्थलमा अवतरण गर्ने क्रममा रहेको पेरुभियन एयरलाइन्सको एउटा विमान दुर्घटनाग्रस्त भएको छ ।
विमानले भूईं छोइसकेपछि आगलागी भएकाले अग्नी नियन्त्रक दल तत्कालै त्यहाँ पुगी उद्धार गर्न सफल रहेकाले विमानमा सवार सबै यात्रुहरु सकुशल रहेका पनि स्थानीय सन्चार माध्यहरुले जनाएका छन् ।
पेरुभियन एयरलाइन्सको उक्त बोइङ्ग–७३७ विमानमा चालक दलका सदस्य सहित एकसयचालीस जना यात्रु सवार रहेका पनि पेरुको एउटा दैनिक पत्रिका एल कमर्सियोले उल्लेख गरेको छ ।
उक्त विमान गतः मङ्गलबार स्थानीय समयाअनुसार साँझ ५ बजे (नेपाली समय अनुसार बुधबार बिहान सबेरै) जाउजा विमानस्थलमा अवतरण गर्न लागेको थियो ।
घटना भइरहेको समयमै विमानस्थल परिसर बाहिरबाट कोही शोखिनदार ब्यक्तिले खिँचेको भिडियो क्यामेराले दुर्घटनाग्रस्त विमानबाट कालो र बाक्लो धुवाँको मूस्लो उठिरहेको र यस धुवाँको मूस्लोले यात्रुमाझ ठूलो त्रास सिर्जना गरेको दृश्य देखाएको थियो ।
के, कस्ता कारणले विमानमा आगलागी हुन पुगेको हो सो तथ्य तत्काल खुल्न नसकेको पनि जनाइएको छ ।
