लन्डन । बेलायतका नेपाली रेष्टुरेन्ट जनशक्ति अभावले संकटमा परेको गुनासो व्यवसायीहरुले गरेका छन् । बेलायतस्थित नेपाली रेष्टुरेन्टहरुको संस्था नेपलिज क्याटरर्स एसोसिएसन यूकेले आफ्ना व्यवसायले सामना गर्नु परेको जनशक्ति अभावबारे नेपालका उद्योगमन्त्री नवीन्द्रराज जोशीलाई अवगत गराएको हो ।
बेलायत भ्रमणमा रहेका उद्योगमन्त्री जोशीलाई व्यवसायीले लन्डनस्थित नेपाली दूतावास पुगेर ज्ञापनपत्र बुझाएका थिए । दक्ष कामदारका कारण नेपाली रेष्टुरेन्टले बेलायतमा झेलिरहेको संकट बेलायत सरकारसमक्ष पुरयाइदिन मन्त्री जोशीसमक्ष आग्रह गरिएको छ ।
सरकारको कडा अध्यागमन नियमका कारण ब्रिटेनका नेपाली रेष्टुरेन्टले गैर युरोपेली मुलुकबाट सेफ र दक्ष कामदार झिकाउन असमर्थ भएको र यसले रेष्टुरेन्ट व्यवसाय नै संकटमा परेको ज्ञापनमा उल्लेख छ । बेलायतमा ३७५ वटा नेपाली रेष्टुरेन्ट भएको उनीहरुको विश्वास छ । आफ्ना रेष्टुरेन्टले मात्र करिब ७ हजार ५ सय जनालाई रोजगारी र बेलायतको अर्थतन्त्रमा तीन प्रतिशत योगदान दिएको पनि व्यवसायीले दावी गरेका छन् ।
ज्ञापनमा सरकारको कठोर नियमका कारण नेपालीसहित बेलायतका झण्डै १० हजार रेष्टुरेन्टले जनशक्ति अभाव झेलिरहेको बताइएको छ । बेलायतको करी उद्योग (रेष्टुरेन्ट) ले मात्र वार्षिक ५ बिलियन पाउण्ड बेलायती अर्थतन्त्रमा योगदान गरिरहेको पनि स्मरण गराइएको छ ।
एसोसिएसनका संस्थापक अध्यक्ष ध्रुव केसी, अध्यक्ष विजय थापा, कानुनी सल्लाहकार राजु थापा, सचिव ओजेश सिंह डंगोल, किशोर सापकोटा र एनआरएनए युरोप कोअर्डिनेटर कुल आचार्यले हस्ताक्षर गरेको उक्त ज्ञापनमा सरकारले स्पेशलिष्ट सेफहरुलाई ‘इमिग्रेसन सर्टेज अकुपेशन लिष्ट’ मा राखेपनि अधिकांश रेष्टुरेन्टहरुले टेक वे, डेलिभरी, बफेट डाइनिङ र इभेन्ट क्याटरिङ गर्ने भएकाले उनीहरु सरकारको नियमबाट पीडित रहेको उल्लेख छ ।
बेलायतस्थित नेपाली रेष्टुरेन्टले भूकम्पपछि झण्डै २५ हजार पाउण्ड नेपाली दूतावासमार्फत पठाएको स्मरण गर्दै ज्ञापनमा नेपाली खाना अन्तर्राष्ट्रिय स्तरमा प्रवर्धन र प्रचार प्रसार गर्न रेष्टुरेन्टहरुले उल्लेख्य भूमिका निर्वाह गरेको जनाइएको छ ।
