डा. सुवेदी आयरल्याण्डका लागि पनि राजदूत नियुक्त

लन्डन । बेलायतका लागि नेपाली राजदूत डा. दुर्गाबहादुर सुवेदी आयरल्याण्डका लागि समेत राजदूत नियुक्त भएका छन् । आज मंगलबार २१ मार्च, २०१७ अर्थात चैत्र ८, २०७३ का दिन राष्ट्रपति विद्यादेवी भण्डारीले नेपालको संविधानको धारा २८२ को उपधारा (१) बमोजिम मन्त्रिपरिषदको सिफारिसमा सुवेदीलाई आयरल्याण्डका लागि समेत राजदूत पदमा नियुक्त गरेको दूतावासले जनाएको छ ।

करिब ६ महिनाअघि २० औं राजदूतका रुपमा बेलायत आएका सुवेदीले हिजो २० मार्चमा मात्र बेलायत नेपाल कुटनीतिक सम्वन्ध स्थापनाको दुईसय वर्ष पुरा भएको अवसरमा बेलायती राजकुमार हयारीलाई निम्त्याएर साताव्यापी कार्यक्रम समापन गरेपछि उनी चर्चाको शिखरमा छन् ।

सुवेदीले कार्यभार सम्हालेकै भोलिपल्ट दूतावासले प्रदान गर्ने भिसा, राहदानी लगायत कन्सुलर सेवा सहज बनाइ शीघ्र तवरले जनमैत्री सेवा प्रदान गर्न भिसा सेवा बिहान ९.१५ देखि अपरान्ह ३.१५ बजेसम्म र राहदानी तथा अन्य कन्सुलर सेवा बिहान ९.१५ देखि अपरान्ह ५ बजेसम्म 
गर्ने निर्णय गरेका थिए । अहिले दूतावासले उही दिनमा भिजा दिने व्यवस्था गरेको छ ।