अल्डरसट घटनाकी अभियुक्त सुनमायालाई चार अभियोग

लण्डन । अल्डरसट घटनाकी अभियुक्त सुनमाया तामाङलाई प्रहरीले चारवटा अभियोग लगाएको छ ।
ह्याम्पसायर प्रहरीका अनुसार उनलाई ज्यान मारेको, ज्यान मार्ने प्रयास गरेको, झूठो काराबास र चोरीको अभियोग लगाइने भएको छ ।
अल्डरसटस्थित भिक्टोरिया रोडकी ५० वर्षीया तामाङलाई मंगलबार बेजिंगस्टोक मेजिस्ट्रेट कोर्टमा उपस्थित गराइने भएको छ ।
गत शुक्रबार साँझ ५:३० बजे तामाङको निवासमा ग्रोभ रोड अल्डरसट निवासी ७५ वर्षीय मान लिम्बु अचेत अवस्थामा फेला परेका थिए । उनलाई चिकित्सकहरुले घटनास्थलमै मृत घोषित गरेका थिए । सोही दिन प्रहरीले तामाङलाई नियन्त्रणमा लिएको थियो ।
प्रहरीले यस घटनामा अनुसन्धान गर्न अपरेसन डोभ नामक अभियान संचालन गरेको थियो ।