ओस्लो, ९ माघ । नोबेल शान्ति पुरस्कार छनौट गर्ने नर्वेली नोबेल समितिकी अध्यक्ष कासी कलम्यान फाइभको ६५ वर्षको उमेरमा निधन भएको छ ।
उहाँको आइतबार निधन भएको अधिकारीहरुले सोमबार जानकारी दिएका छन् ।
“उहाँ धेरै युवतीका लागि अनुकरणीय व्यक्तित्व हुनुहुन्थ्यो,” नर्वेको कन्जरभेटिभ प्रधानमन्त्री इर्ना सोल्बर्गले फेसबुकमा लेख्नु भएको छ ।
उहाँ सन् २००३ मा नोबेल कमिटीको सदस्य बन्नु भएको थियो भने सन् २०१५ मा अध्यक्षमा निर्वाचित हुनुभएको थियो ।
अमेरिकाका पूर्व उपराष्ट्रपति अल गोरेलाई सन् २००७ मा, अमेरिकाका पूर्वराष्ट्रपति बाराक ओवामालाई सन् २००९ मा, चिनियाँ अभियन्ता लिउ चिओवोलाई सन् २०१० मा र इरानका मानवअधिकारकर्मी शिरिन इवाडीलाई सन २००३ मा नोबेल शान्ति पुरस्कारका लागि छनौट गर्न उहाँले निर्णायक भूमिका खेल्नुभएको थियो ।
उहाँ पूर्वव्यापारी हुनुका साथै सन् १९८९ देखि १९९० सम्म वाणिज्य मन्त्री र सन् १९९१ देखि १९१४ सम्म कन्जरभेटिम पार्टीको नेत्री बन्नु भएको थियो ।
“हामीले एउटा सशक्त, प्रिय महिला अगुवा र कन्जर्भेटिभ पार्टीकी नेत्रीलाई गुमाएका छौँ,” सोल्बर्गले उल्लेख गर्नुभएको छ ।
उहाँको स्टाटसमा थप लेखिएको छ, “कासीको परिवारप्रति मेरो पूरा सहानुभूती र समवेदना छ, हामी धेरै जना उहाँको बारेमा सोचिरहेका छौँ ।”
एक जना नर्वेलीको छोरीका रुपमा कलम्यानको जन्म सन् १९५१ को अप्रिल १५मा ओस्लोमा भएको थियो ।
कलम्यानले आर्थिक पत्रिकाका पूर्वसम्पादक कार्सटेन ओ फाइभसँग विहे गर्नुभएको थियो । उहाँका दुई जना सन्तान छन् ।
