फाइल तस्विर
काबुल, २४ माघ । अफगानिस्तानमा सन् २०१६ मा मात्रै झन्डै ११ हजार ५०० जना नागरिक प्रभावित भएको तथ्याङ्क सार्वजनिक गरिएको छ ।
संयुक्त राष्ट्रसङ्घले सोमबार सार्वजनिक गरेको तथ्याङ्कमा प्रभावित हुनेहरुमध्ये एक तिहाई बालबालिका रहेका छन् ।
प्रभावित हुनेहरु ११ हजार ४८१ जनामध्ये तीन हजार ४९८ जनाको मृत्यु भएको छ भने सात हजार ९२० जना घाइते भएका छन् । यो सङ्ख्या सन् २०१५ कोभन्दा तीन प्रतिशत बढी हो ।
मानवीय क्षतीको यो विवरणले अफगानिस्तानमा युद्धका कारण असुरक्षा थप बढ्दै गएको देखाएको छ ।
सरकारी सुरक्षा फौज र विद्रोही लडाकुहरुकाबीचमा भएका भिडन्तमा परी उनीहरुको मृत्यु भएको हो । युद्ध अफगानिस्तानको ३४ प्रान्तमा फैलिएको छ ।
तथ्याङ्कले हवाई आक्रमणमा पर्नेको सङ्ख्या पनि गत वर्ष अहिलेसम्मकै सबैभन्दा धेरै रहेको देखाएको छ ।
सन् २०१६ मा हवाई आक्रमणमा परी प्रभावित हुने ५९० जनामध्ये २५० जनाको मृत्यु भएको थियो । यो तथ्याङ्क सन् २०१५ को भन्दा झन्डै दोब्बर हो ।
प्रभावित हुनेमध्ये अत्याधिक धेरै अर्थात् ६१ प्रतिशत सरकार विरोधी रहेका छन् भने सरकार समर्थक २४ प्रतिशत रहेका छन् । सरकार विरोधीमा तालिवानी लडाकु, इश्लामिक स्टेट (आईएस) लडाकुलगायत रहेका छन् ।
