पटाका बजारमा विस्फोट हुंदा ३१ को मृत्यु

तुल्टेपेक (मेक्सिको), ६ पुस । मेक्सिकोको ठूलो पटाका बजारमा मङ्गलबार भएको भीषण विस्फोटमा परी कम्तीमा ३१ व्यक्तिको मृत्यु भएको छ । यस विस्फोटमा परी अन्य ७२ जना घाइते भएका अधिकारीहरुले जानकारी दिएका छन् ।

मेक्सिको राज्यमा प्रमुख अभियोक्ता एलेजन्ड्रो गोमेजका अनुसार सुरुमा यस विस्फोटमा परी नौ मृत्यु भएको जानकारी दिइएको थियो । तर पछि यो सङ्ख्या बढेर ३१ पुग्यो ।

घाइते मध्ये घेरैको अवस्था चिन्ताजनक भएको हुनाले यो सङ्ख्या अझै बढ्न सक्ने अनुमान गरिएको पनि उहाँले बताउनुभएको छ । स्थानीय समयानुसार मङ्गलबार अपराह्न २ः५० बजे यो घटना भएको थियो ।

दुर्घटनास्थलबाट २६ व्यक्तिको शव निकालिएको र पाँच व्यक्तिको अस्पतालमा उपचारको क्रममा मृत्यु भएपछि सो सङ्ख्या ३१ पुगेको राज्यका गभर्नर इरुभिइल एभिलले बताउनुभएको छ ।

सङघीय प्रहरीका अनुसार यस घटनामा घाइते भएका ७२ व्यक्तिहरुलाई अस्पतालको आकस्मिक कक्षमा उपचारको लागि राखिएको छ । तीमध्ये २१ जना भने उपचारपछि घर फर्किएका छन् ।

अग्नी नियन्त्रण दलमा सदस्यहरुको तीन घण्टासम्मको संघर्षपछि सो आगलागीलाई नियन्त्रणमा लिइएको बताइएको छ ।