मदिराका रूपमा ‘वाथलोसन’ पिउँदा मर्नेको संख्या ५३

मस्को (रसिया), ५ पुस । रसियाको साइबेरियाली सहर इरकुस्कमा मदिराका रूपमा ‘वाथलोसन’ पिएपछि मृत्यु हुने व्यक्तिको सङ्ख्या मङ्गलबार ५३ पुगेको छ । यस वाथलोसन पिएर अन्य २६ जना विरामी भएका र अझै अस्पतालमा रहेको रसियाको समाचार संस्था टीएएसएसले जनाएको छ ।

यसअघि सोमबार रसियाका सञ्चार संस्थाहरुले २१ जनाको मात्रै मृत्यु भएको बताएका थिए ।

मदिराका रुपमा सेवन गरिएको यस विषाक्त पदार्थबाट ठुलो संख्यामा नागरिकहरुको मृत्यु भएको प्रति राष्ट्रपति भ्यादिमिर पुटिनले गहिरो दुःख व्यक्त गर्नुभएको उहाँका प्रवक्ता डिमित्री पेस्कोभले जानकारी दिनुभएको छ ।

राष्ट्रपति पुटिनले घटनाका बारेमा विस्तृत जानकारी लिइरहनु भएको पनि उहाँले बताउनुभयो ।

प्रधानमन्त्री दिमित्री मेदभेदेभले पनि सोमबार नै मन्त्रीपरिषद् बैठक बोलाएर सरोकारवाला निकायलाई घटनाका बारेमा अध्ययन गर्न र गलत कामलाई तत्काल बन्द गर्न तथा दोषीलाई कारबाही गर्न निर्देशन दिनुभएको छ ।

स्थानीय अधिकारीले इरकुस्कमा आपतकालीन अवस्था घोषणागरी थप मानिसको मृत्यु नहोस् भनी मदिराको रूपमा लिइने ‘वाथलोसन’ व्यापारीमाथि निगरानी बढाएका छन् ।

स्थानीय प्रशासनले लोसनको बिक्रीमा संलग्न भएको आशङ्कामा कैयौँ मानिसलाई नियन्त्रणमा लिइएको जनाएको छ ।

इरकुस्कको क्षेत्रीय प्रशासनले जनाएअनुसार मृतक सबैमा मिथानोल नामक विषाक्त पदार्थ भेटिएको र यो वाथलोसन पिएका कारण मृत्यु भएको जनाएको छ ।

लोसनको बोटलमा उक्त पदार्थ बाहिरी प्रयोगका लागि मात्रै प्रयोग गर्न सकिने स्पष्ट सङ्केत भए पनि स्थानीयवासीले मदिराको सस्तो विकल्पका रूपमा यसलाई पिउने गरेको पाइएको छ ।