लन्डन । गैर आवासीय नेपाली संघ बेलायत (एनआरएनए, यूके) ले आगामी साता हुन गइरहेको च्यारिटी भव्य बनाउने तयारी गरेको छ ।
हिजो आइतबार सम्पन्न कार्यसमिति बैठकले नेपाल हाउसका लागि आर्थिक सहयोग जुटाउन आगामी २६ डिसेम्बर अल्डरसटमा हुन लागेको च्यारिटी सफल बनाउन विस्तृत कार्यक्रम तय गरेको हो ।
अध्यक्ष मुछेत्र गुरुङको अध्यक्षतामा भएको उक्त बैठकमा च्यारिटी भव्य बनाउन दिपक श्रेष्ठ, ललित न्यौपाने, सुरज मास्के, ललित गुरुङ, सालिक सापकोटा र फडिन्द्र भट्टराईलाईका लागि परिचालन गर्ने निर्णय भएको छ । कोषाध्यक्ष दीपक श्रेष्ठले अन्तमा संकलित रकमबारे घोषणा गर्ने कार्यक्रम छ ।
त्यसैगरि, शान्ति थापा कुंवर, सुशिला राई, मन्जु भण्डारी र छविमाया पुनलाई खादा र अतिथी सत्कारमा खटाइएको छ भने प्रोजेक्टर लगायत अन्य कार्यक्रम व्यवस्थापन मिलन गुरुङलाई जिम्मा दिइएको छ ।
बैठकले सदस्यता नवीकरण र नयां वितरण गर्ने निर्णय भएको छ । नेपाली दूतावासमा सदस्यता फाराम वितरणको व्यवस्था गर्ने निर्णय समेत भएको छ ।
बैठकले संघको मुखपत्र एनआरएन भ्वाइस २६ डिसेम्बरकै दिन बिमोचन गर्ने निर्णय गरेको छ । त्यसै गरि, बैठकले क्षेत्रीय शाखाहरु स्कटल्याण्ड, नर्दन आयरल्याण्ड, वेल्स र मिडल्याण्डमा विस्तार गर्ने जिम्मा उपाध्यक्ष दासु पाण्डेलाई दिने निर्णय गरेको छ ।
बैठकले आर्थिक समितिमा एक जना सदस्य स्मृति श्रेष्ठ निरौलालाई थप गर्ने र सिरिसेको हिसाव मिलान गर्ने निर्णय गरेको सहमहासचिव अर्जुन कटुवालले जानकारी दिए ।
बैठकले संघको वेवसाइट अपडेट गर्ने, कार्यसमितिका सबै पदाधिकारीहरुसंग एकसय पाउण्ड र मनोनित सदस्यहरुसंग रकम असुल गर्ने निर्णय गरेको छ ।
अर्को कार्यसमिति बैठक फेब्रुअरीमा प्लमस्टिडमा बस्ने निर्णय भएको छ ।
