टोरोन्टो । एनआरएनए केन्द्रिय उपाध्यक्ष भवन भट्टसंग क्यानाडावासी नेपालीले अन्तरक्रिया गरेका छन् । एनआरएनए क्यानाडाले कार्यक्रम आयोजना गरेको हो । कार्यक्रममा उपाध्यक्ष भट्टले भूकम्पपछि पुनर्निर्माणमा एनआरएनको प्राथमिकता रहेको बताए । उनले आफ्नो स्वागत तथा सम्मान गरेकामा आयोजकप्रति आभार समेत व्यक्त गरे । व्यापार व्यवसाय पर्वाह नगरि आफ्नो अमुल्य समय मातृभूमिको विकास तथा समाजसेवामा खर्चिएका भट्ट अमेरिका, क्यानाडा हुंदै जापान जाने क्रममा कार्यक्रममा सहभागी भएका थिए ।
एनआरएनए क्यानाडाका महासचिव सुमन लम्सालले सञ्चालन गरेको उक्त कार्यक्रममा विभिन्न नेपाली संघसंस्थाका प्रतिनिधिहरुले आफ्नो परिचय तथा छोटो मन्तव्य राखेका थिए ।
सो क्रममा माउन्ट एभरेष्ट लायन्स क्लबका अध्यक्ष मित्र काफ्लेले भट्टको स्वागत गर्दै क्रिसमस र नयां वर्षको अग्रिम शुभकामना व्यक्त गरे । काफ्लेले विदेशमा छरिएर रहेका नेपाली नेपालीबीच एकता हुन आवश्यक रहेको बताए । नकारात्मक सोच त्यागेर सकारात्मक सोचका साथ नेपाली समाज मातृभूमिको विकासमा अघि बढ्नुपर्ने उनको धारणा थियो ।
