शनिबार, कार्तिक ८ २०७७ | Sat, October 24, 2020
नेपालको समय: ०३:१३ | UK Time: 22:28

अलेप्पोवासीको सहयोगका लागि विश्वको चासो

वीनेपाली
२०७३ मंसिर २६ गते १:४४
सिरियन डेमोक्रेटिक फोर्सेसका लडाकुहरु आइएस विरुद्ध लड्न तयारी अवस्थामा । तस्विरः एएफपी

सिरियन डेमोक्रेटिक फोर्सेसका लडाकुहरु आइएस विरुद्ध लड्न तयारी अवस्थामा । तस्विरः एएफपी

पेरिस (फ्रान्स), २५ मङ्सिर । सिरियाको प्राचीन सहर अलेप्पोमा राष्ट्रपति बसर अल असद र उहाँका सहयोगीहरुद्वारा कारबाहीलाई तीव्रता दिएका बेला अमेरिकी विदेशमन्त्री जोन केरीलगायतका विश्वका अधिकारीले सर्वसाधारणको समस्याप्रति चासो व्यक्त गर्दै निराश प्रतिपक्षीको सुरक्षाका लागि पहल थालेका शनिबार जनाएका छन् ।

अलेप्पोबाट दशौँहजार मानिस आफ्ना घर छाडेर विस्थापित भइरहेको समयमा अमेरिकी विदेशमन्त्री केरीले आफू अलेप्पो र अलेप्पोवासीको सुरक्षाका लागि अहोरात्र खटिरहेको बताउनुभयो ।

“म अलेप्पो र अलेप्पोवासीलाई पूर्ण नाश हुन नदिन लागिपर्नेछु” – केरीले भन्नुभयो ।

अमेरिकी विदेशमन्त्री केरी, युरोपेली तथा अरवी कूटनीतिज्ञले सिरियाली प्रतिपक्षी दलका वरिष्ठ सदस्यसँग शनिबार पेरिसमा भेट गर्नुभएको छ । भेटको व्यवस्था फ्रान्सेली विदेशमन्त्री जाँ मार्क आयरुल्टले मिलाउनुभएको बुझिएको छ ।

यसैबीच, अमेरिकी तथा रसियाली सैन्य विज्ञहरुबीच पनि जेनेभामा भेटवार्ता भएको छ । उनीहरुले अलेप्पोबाट बाहिर भागेका प्रतिपक्षीका विषयमा विस्तृत जानकारी जम्मा गरी उनीहरुको व्यवस्थापनका लागि काम गर्ने जनाएका छन् ।

पश्चिमी मुलुकको सहयोगमा सिरियाली सरकारविरुद्ध सङ्घर्षरत प्रतिपक्षीको भाग्यमाथि रसियालगायतका सिरियाली राष्ट्रपति वसर अल असदका सहयोगीद्वारा पूर्वी अलेप्पोलाई कब्जामा लिन सफल भएपछि सङ्कट देखापरेको छ ।

सिरियामा असदविरुद्ध विगत पाँच वर्षदेखि सङ्घर्षरत प्रतिपक्षीलाई उनीहरुको नियन्त्रणमा रहेको अलेप्पो सहर आफ्नो पकड बाहिर पुगेपछि समस्या देखिएको हो ।

शुक्रबार राति पेरिसमा अलेप्पो समस्याबारे बोल्दै अमेरिकी विदेशमन्त्रीले ‘मानिसहरु निरन्तर हुने बैठकदेखि निराश बनिसकेका छन् । सिरियाका सर्वसाधारणको मृत्यले स्तब्ध पारिरहेको छ । अब पनि बैठक उपलब्धिपूर्ण नहुने हो भने मेसेच्युटमा सुन्दर बिदा मनाउने योजनासहित निराश फर्किनुको विकल्प छैन ।

संयुक्त राष्ट्रसङ्घका लागि अमेरिकी राजदूत सामन्थ पावरले यस हप्ता अलेप्पोमा खाद्यान्नलगायतको आधारभूत सामग्री आपूर्ति गर्न रसियाका कारण नसकिएको आरोप लगाउनुभयो ।

उहाँले राष्ट्रपति असदको प्रशासनले रसियाको सहयोगमा सिरियाली विद्यालय, अस्पताल, सर्वसाधारणका गाउँहरु ध्वस्त पारेको दाबी गर्दै अहिले सिरियाली जनता औषधि, खाद्यान्नलगायत जीउनका लागि आधारभूत सामग्रीको अभावका बाँचिरहनुपरेको छ भन्नुभयो ।

यता रसियाले भने राष्ट्रपति असदको इस्लामिक अतिवादी समूहमाथिको कारबाहीमा सहयोग पुरयाएको बताएको छ ।

राष्ट्रसङ्घका लागि रसियाली राजदूत भाइटली चुर्किनले सिरियाली प्रतिपक्षीमा अतिवादी इस्लामिक समूहको विचारले प्रधानता पाएको भन्दै सिरियामा नरम दलीय प्रतिपक्षीको धारणा हराएर गएको प्रतिक्रिया दिनुभएको तास न्यूज एजेन्सीले जनाएको छ ।

प्रतिक्रिया

सम्बन्धित सामाग्री

फेसबुक