इटालीका प्रधानमन्त्रीद्धारा राजिनामाको घोषणा

रोम, २१ मङ्सिर । इटालीका प्रधानमन्त्री मटिओ रेन्जीले सन् २०१७ को बजेट पारित भएपछि औपचारिक रुपमा आफ्नो पदबाट राजिनामा दिने घोषणा गर्नु भएको इटालीका राष्ट्रपति सेर्जिओ मट्टारेल्लाले सोमबार जानकारी दिनुभएको छ ।

आइतबार भएको जनमतसङ्ग्रहमा प्रधानमन्त्री रेन्जीले संवैधानिक परिर्वतनको प्रस्ताव अस्विकृत भएपछि सोमबार उहाँले औपचारिक रुपमा राजिनामा दिने घोषणा गर्नु भएको छ ।

जनमत सङग्रहमा संशोधन प्रस्तावका विरुद्धमा ५९ प्रतिशत मत परेको थियो । यस पक्षमा ४१ प्रतिशत मत परेको थियो ।

रेन्जीले आइतबार नै संशोधन प्रस्ताव पारित नभएमा आफुले राजिनामा दिने घोषणा गर्नुभएको थियो । सन् २०१४ मा इटालीको सवभन्दा कान्छो उमेरको प्रधानमन्त्रीको रुपमा रेन्जी चयन हुनु भएको थियो ।

सोमबार उहाँले मन्त्रीपरिषद्को छोटो बैठक राखेपछि बेलुका राष्ट्रपति मट्टारेल्लालाई क्विरिनल दरबारमा भेट्नु भएको थियो ।