तस्विरः सुरज पौडेल
लन्डन । वीन्टरमा बेलायतको मौसम खुल्न अलिक आनाकानी गर्छ । कुन बेला घाम उदाउने हो अनि कहिले अस्ताउने थाहै हुन्न । बिहीबार एकछिन घमाइलो देखिन्थ्यो क्याम्बर्ली । हाइ स्ट्रिटमा रहेको ‘सो एसिया’ नामक रेष्टुरेन्ट अगाडि केही नौला मानिस एकत्रित देखिन्थे । बाटो हिंड्नेहरु अनौठो मानेर एक जोडीलाई हेरिरहेका थिए । ‘दयाहाङ ले प्रियंकालाई फूल दिएर प्रेम प्रस्ताव गरिरहेको दृश्यमा छौं हामी’, निर्देशक मिलन चाम्स भन्दै थिए ।
बेलायतमै करिब एक करोड ७० लाख रुपैयां लगानीमा बन्न लागेको फिल्म ‘हयाप्पी डेज’ टिम चौंथो दिन पनि सुटिङमा व्यस्त रह्यो । यतिखेर क्याम्बर्ली, रेडिङ, फार्नबोरो लगायत लोकेशनमा फिल्म सुटिङ भइरहेको छ ।
‘ज्यादै रमाइलो लागिरहेको छ’, प्रियंकाले भनिन्, ‘नेपाली फिल्म उच्च प्रविधि र प्राविधिक सहित बेलायतमा छायांकन हुनुले अब यस क्षेत्र अझ व्यापक हुंदै गएको प्रष्ट हुन्छ ।’ प्रियंकाले ७३ वटा मध्ये ६० बढि सिन आफ्नो भएकाले डिसेम्बर अन्तिमसम्म बेलायतमै व्यस्त हुने बताइन् । हिउंले ढाकिएको सेताम्मे लोकेसनमा ‘सुट’ गर्ने उनको सपना छ ।
मिलन चाम्सले नै निर्देशन गरेको ‘बीर विक्रम’ प्रचार प्रसारमा केही महिना अघि बेलायत आएका दयाहाङ यसपटक बेलायत बसाइको उद्देश्य फरक भएकाले दंग छन् ।
यस फिल्म छायांकनकै लागि छायांकार रामकुमार केसी, प्रमुख सहायक निर्देशक गिरीराज घिमिरे, सम्पादक अर्जुन जिसी, द्वन्द्व निर्देशक सकुमार बस्नेत, कलाकार सन्जय गुप्ता, सहायक निर्देशक एवं फोटोग्राफर करुणा गुरुङ बेलायत छन् ।
वीपी खनाल, विक्रम जोशी, नरेश शर्मा, डा. अशोक बन्सल, सपनकुमार राई र मिलन चाम्सले फिल्म निर्माणमा लगानी गरेका छन् ।
