लोकमान विरुद्ध अर्का डाक्टर

लन्डन । नेपाली कांग्रेसको थिंक ट्यांक संस्था प्रजातान्त्रिक विचार समाजका अध्यक्ष डा. केदारनरसिंह केसीले निलम्बित अख्तियार प्रमुख लोकमानसिंह कार्कीले कानुनी राज्यको उपहास गरेको जिकिर गरेका छन् ।

‘इन्टरनेशनल युनियन अगेन्स्ट टिबी एण्ड लंग डिजिज’ सेमिनारमा सहभागी हुन लन्डन आएका नेपाल चिकित्सक संघका पूर्व अध्यक्ष केसीले कार्कीले लोकतान्त्रिक पद्दति, विधिको शासन र कानुनी राज्यको उपहास गरेको दावी गरे ।

‘संवैधानिक अंगको प्रमुखलाई जनताको सार्वभौम सम्पन्न संसदले बोलाउंदा उपस्थित नहुने, सर्वोच्च अदालतले केही सोध्न बोलाउंदा नजानु नै महाभियोगको बलियो आधार भयो’, केसीले भने ।

कार्कीको नियुक्ति अघि नागरिक समाजका तर्फबाट आफूहरुले तत्कालिन 
राष्ट्रपति डा. रामवरण यादवसंग भेटेर उनको नियुक्ति रोक्न आग्रह गरेको र 
राष्ट्रपतिले समेत शपथ ख्वाउनु परे पद छाड्छु भनेको स्मरण गर्दै केसीले भने, ‘तर रातारात परिस्थिति बदलियो ।’ अब भने महाभियोग विरुद्ध कसैले षडयन्त्र गर्न नसक्ने उनको विश्वास छ ।

केसीले कांग्रेस लोकतान्त्रिक पार्टी भएकाले उसले महाभियोगको पक्षमा मतदान गर्नुपर्ने सुझाव समेत दिए ।

३७ वर्ष यता चिकित्सा क्षेत्रमा क्रियाशिल वीपी स्मृति अस्पतालका चिकित्सक केसीले स्वास्थ्य क्षेत्रको विकृति विरुद्ध गोविन्द केसीको आवाज जायज भएको उल्लेख गरे । उनले विदेशमा रहेका बुद्धिजिवीहरुलाई देशका लागि पनि 
आफ्नो सीप र ज्ञान बांड्न आग्रह गरेका छन् ।