लन्डन । नेप्लिज नर्सिङ असोसिएसन यूकेले आफ्नै खर्चमा काभ्रेमा प्राथमिक शिक्षालय (लर्निङ सेन्टर) स्थापना गरिदिएको छ ।
असोसिएसनले काभ्रेको देउपुर, सिपाघाटमा गंगा जमुना मितेरी प्राथमिक शिक्षालय बनाएको हो । उक्त शिक्षालय भवनको असोसिएसन अध्यक्ष प्रसुना कंडेल र सल्लाहकारद्वय टुका क्षेत्री र कमला पाण्डेले एक समारोहबीच गत बुधबार उद्घाटन गरे । असोसिएसनले बनाएको उक्त सेन्टरमा एकसय जना बालबालिका अध्ययन गर्न सक्ने अध्यक्ष कंडेलले जनाइन् । उक्त क्षेत्र नजिक रहेको प्राथमिक विद्यालयमा कक्षा १, २ र ३ को मात्र पढाइ भएपनि नर्सरी नभएकाले स साना वालवालिका शिक्षाको ज्योतिबाट वञ्चित हुंदै आएका थिए ।
उद्घाटन समारोहमा कंडेल, क्षेत्री र पाण्डेले करिब ७५ जना बालबच्चालाई पेन्सिल, कटर, इरेजर र कापी समेत बांडे ।
असोसिएसनले भूकम्पपछि पुनर्निर्माणको आफ्नो प्रोजेक्ट अन्तर्गत शिक्षालय बनाएको हो ।
अध्यक्ष प्रसुना कंडेलले उक्त शिक्षालय बनाउन हृदयदेखि सहयोग गर्ने बेलायतस्थित सम्पूर्ण दाताहरु, संघसंस्था र शुभचिन्तकप्रति आभार व्यक्त गरेकी छिन् ।
यसैबीच, कंडेलले २१ जनवरीमा हुने असोसिएसनको कार्यसमिति बैठक र फेब्रुअरी २५ मा गर्न लागिएको वार्षिक कन्फेरेन्समा सहभागिताका लागि सम्पूर्ण कार्यसमिति पदाधिकारी, सदस्य र सल्लाहकारहरुमा आव्हान गरेकी छिन् ।
पेन्सिल, कटर, इरेजर र कापी बांड्दै बायांबाट क्रमशः क्षेत्री, पाण्डे र कंडेल
