लन्डन । बेलायतको गृह मन्त्रालय (होम अफिस) ले अध्यागमन नियममा परिवर्तन गरेको छ । २४ नोभेम्बरदेखि लागू हुने गरि टियर वान, इन्टरप्रिनर, टियर टु, टियर ५ र टियर फोर क्याटगोरिजमा केही नियम परिवर्तन गरिएको हो ।
३ नोभेम्बर बिहीबार घोषणा गरिएको नियममा वर्क परमिट भिजा लिन वार्षिक तलव बढाइएको छ । टियर टु जनरल (वर्क परमिट) अन्तर्गत अनुभवी कामदारको हकमा वार्षिक कम्तीमा २५ हजार तलव भएको हुनुपर्ने बनाइएको छ । टियर टु इन्ट्रा कम्पनी ट्रान्सफर अन्तर्गत छोटो अवधिको कर्मचारीका लागि बढाएर ३० हजार पाउण्ड पुर्याइएको छ भने टियर टु इन्ट्रा कम्पनी ट्रान्सफर ग्रयाजुएट प्रशिक्षार्थीका लागि तलव घटाउंदै वार्षिक २३ हजार पाउण्ड गरिएको छ । तर, इन्ट्रा कम्पनीका लागि अधिकतम २० कोटा प्रतिवर्ष गरि बढाइएको सोलिसिटर राजु थापाले जानकारी दिए ।
यसैवर्ष जनवरी, २०१६ मा घोषणा भएको अंग्रेजी भाषाका लागि लेभल ए टु तोकिएको छ । साढे दुई वर्षसम्म भिजा लिएर आएका बेलायती वा यहांका स्थायी बसोवास गरिरहेका श्रीमान वा श्रीमतिका हकमा साढे दुई वर्षपछि अध्यागमन नियमको अनुसूची एफएम अन्तर्गत ५ वर्षसम्म भिजाका लागि सोही अवलम्बन गर्नुपर्ने नयां नियममा छ । जसको भिजा १ मे, २०१७ पछि सकिन्छ उनीहरुको हकमा यो नियम लागू हुनेछ । यसका लागि स्पिकिङ र लिसनिङ टेस्ट होम अफिसले तोकेको परीक्षा दिने केन्द्रबाट पास गरेको हुनुपर्नेछ ।
तर, ६५ वर्ष नाघेका वा अपांगको हकमा भने सो नियम लागू हुने छैन् । यस अतिरिक्त टियर वान, इन्टरप्रिनर, टियर टु र टियर ५ युवा परिचालन सम्वन्धमा पनि नियम परिवर्तन गरिएको नयां सूचनामा प्रकाशित छ ।
