फाइल तस्विर, प्रचण्ड
काठमाडौँ, २५ भदौ । प्रधानमन्त्री पुष्पकमल दाहालले आसन्न भारत भ्रमण दुई देशबीचको सम्बन्ध सुधारमा बढी केन्द्रित हुने प्रष्ट पार्नुभएको छ ।
“विगतमा दुई देशको सम्बन्धमा केही न केही चिसोपना आएकै हो, संविधान घोषणादेखि, सरकार गठन, संविधान कार्यान्वयन, र नाकाबन्दीका क्रममा देखापरेको चिसोपनालाई अन्त्य गर्दै दुई देशबीचको सम्बन्धमा विश्वासको आधार खडा गर्नेतर्फ मेरो भ्रमण केन्द्रित हुनेछ” – नेपाल टेलिभिजनबाट आज बेलुका प्रसारित ‘सिधा कुरा प्रधानमन्त्रीसँग’ कार्यक्रममा उहाँले भन्नुभयो ।
भ्रमणको तयारीस्वरूप भारतसँग विगतमा भएका सहमति सम्झौताको कार्यान्वयनको अवस्थाबारे जानकारी लिनुका साथै त्यस बारेमा कूटनीतिज्ञ र विज्ञहरूसँग छलफल चलाइरहेको पनि प्रधानमन्त्री दाहालले जानकारी दिनुभयो ।
आफूले व्यवस्थापिका–संसद्मा गरेको सम्बोधनमा ल्याइएको नीति तथा कार्यक्रम जनताको पक्षमा गर्न सम्भव भएको जिकिर पनि उहाँले गर्नुभयो । “अरबौँ रूपैयाँ ढुकुटीमा थन्किनुभन्दा भूकम्पपीडितका लागि आठ लाख दिनु सम्भव छ” – उहाँले भन्नुभयो ।
पछिल्लोपटक मुलुकका विभिन्न स्थानमा भइरहेको बाढी पहिरोलगायत अन्य विपत्लाई सरकारले सम्बोधन गर्नेबारे तयारी भइरहेको समेत प्रधानमन्त्री दाहालले जानकारी दिनुभयो । उहाँले विभिन्न माग राखेर पटक पटक आमरण अनशनमा बस्दै आउनुभएका डा गोविन्द केसीका जायज माग पूरा गर्ने प्रतिबद्धता व्यक्त गर्दै उहाँलाई धैर्य गर्न पनि अपिल गर्नुभयो ।
उहाँले रोजगारीका लागि विदेश गएका युवालाई देशभित्रै ल्याउने र नेपालका कलकारखानाको विकास गर्दै जतिसक्दो चाँडो नेपालमै रोजगारी सिर्जना गर्ने प्रतिबद्धता व्यक्त गर्नुभयो ।
संसद्मा सम्बोधनका क्रममा जन्म र मरणमा कर्णालीवासीलाई २० केजी चामल दिन भएको घोषणा अपमान नभई सद्भाव र प्रेममात्रै भएको उहाँको भनाइ थियो ।
आफू भारत भ्रमण जानुभन्दा अघि नै संविधान संशोधन प्रस्ताव दर्ता गराउनका लागि दलहरूसँग तीव्र छलफल भइरहेको प्रधानमन्त्री दाहालले बताउनुभयो ।
एक प्रश्नको जवाफमा प्रधानमन्त्री दाहालले यातायातको क्षेत्रलाई थप व्यवस्थित गर्दै उपत्यकाभित्रको सवारी समस्यालाई समाधान गर्ने प्रतिबद्धतासमेत व्यक्त गर्नुभयो ।
