बनेपा, २९ वैशाख । विज्ञान तथा प्रविधि मन्त्री शिवलाल थापाले नयाँ संविधानअनुसार निर्माण हुने प्रादेशिक संरचनामा सात स्मार्ट सिटी निर्माण हुने बताउनुभएको छ ।
उहाँले आज धुलिखेलमा पत्रकारसँग कुरा गर्दै सात प्रदेशमा बायोटेक्नोलोजीको समेत घोषणा गर्न त्यसलाई बजेटमार्फत सम्बोधन गरिने तयारी भएको जानकारी दिनुभयो ।
‘‘हामीले नीति तथा कार्यक्रममा नै सम्बोधन होस् भन्ने चाहेका थियौँ तर त्यसमा नदेखिएपनि अर्थमन्त्रीले बजेटमा सम्बोधन गर्ने आश्वासन दिनुभएको छ’’ मन्त्री थापाले भन्नुभयो ।
उहाँले आइटी पार्क सञ्चालनका लागि भएका सम्झौता पुनरावलोकन हुने उल्लेख गर्दै काठमाडौँ विश्वविद्यालयसँगको आइटी पार्कसम्बन्धी सम्झौता छलफलको विषय भएको बताउनुभयो ।
यसअघि क्यान काभ्रेको संयोजनमा विज्ञान तथा प्रविधि मन्त्रालयले आयोजना गरेको स्मार्ट सिटीः बहुआयामिक विकास अभियान विषयक कार्यशालामा बोल्दै मन्त्री थापाले स्मार्ट सिटीका लागि ठोस योजना आवश्यक भएकोमा जोड दिनुभयो ।
मन्त्रालयका सचिव गजेन्द्र ठाकुरले स्मार्ट सिटीको अवधारणालाई मूर्तरुप दिन आवश्यक प्रक्रिया अघि बढेको बताउनुभयो ।
कार्यक्रममा सभासद् कञ्चनचन्द्र वादे, क्यान काभ्रेका अध्यक्ष नवराज भुर्तेल, नगरपालिका सङ्घका उपाध्यक्ष अशोक व्याञ्जुलगायतले आइटी पार्क सञ्चालनमा जोड दिनुभएको थियो ।
गोष्ठीमा चीन, भारतलगायत मुलुकबाट करिब ६० जना सहभागी छन् । गोष्ठीमा स्मार्ट सिटीका बारेमा अवधारणापत्र प्रस्तुत हुने क्रम जारी छ ।
