ब्रसेल्सको विमानस्थल बिहीबार पनि बन्द रहने विमानस्थलका प्रमुख कार्यकारी अधिकृत अरनाउद फेइस्टले बताउनुभएको छ ।
मङ्गलबार ब्रसेल्सको विमानस्थल र एक मेट्रो स्टेसनमा छुट्टाछुट्टै विस्फोट गराउँदा कम्तिमा ३५ जनाको मृत्यु भएपछि विमानसेवा अवरुद्ध रहँदै आएको छ ।
घटनाबारे छानबिन भइरहेको र विमानस्थल सञ्चालनमा ल्याउँदा छानबिन गतिविधिमा समस्या हुने भन्दै थप एक दिन अर्थात् बिहीबार पनि विमानस्थलबाट कुनै उडान भर्ने तथा अवतरण नगर्ने भएको फेइस्टले बताउनुभयो ।
बेल्जियम विमानस्थल आक्रमणमा दाजुभाइको संलग्नता
ब्रसेल्सको व्यस्त विमानस्थलमा आक्रमण गर्ने दुई व्यक्ति नोभेम्बर १३ मा पेरिस आक्रमणमा पनि संलग्नता रहेका मानिएका खालिद र इब्राहिम एल बक्राउई नामधारी दाजुभाइ रहेको प्रहरी छानबिनमा थाहा हुन आएको आरटीबीएफ टेलिभिजनले बताएको छ ।
प्रहरीले उनीहरुलाई सालेह अवेसलामसँग सम्पर्क रहेको दाबी गर्दै आएको छ ।
आत्मघाती बम विस्फोटमा परी ३५ व्यक्तिको मृत्यु भएपछि त्यहाँ बुधबारदेखि तीन दिनसम्म शोकको घोषणा गरिएको छ ।
विमानस्थलमा विस्फोट भएको एक घण्टापछि स्थानीय समयअनुसार करिब ९ बजे पुनः मेट्रो स्टेसनमा विस्फोटन भएको थियो । यस विस्फोटमा परी सयौँ व्यक्ति घाइते भएका स्थानीय अधिकारीहरुले जानकारी दिएका छन् ।
घटनापछि बेल्जियमले राष्ट्रिय शोकको घोषणा गरेको छ । जसअनुरूप तीन दिनसम्म राष्ट्रिय झण्डा आधा झुकाइने सरकारले बताएको छ । आज स्थानीय समयअनुसार बिहानको ११ बजे शोक सभाको आयोजना गरी एक मिनेट मौनधारणा गरिएको थियो ।
बेल्जियमका प्रधानमन्त्री चाल्स मिसेलले यस दिनलाई कालो दिनको संज्ञा दिनुभएको छ । यस्तो भीषण आक्रमण बेल्जियमले यस अघि कहिल्यै नदेखेको पनि उहाँले टिप्पणी गर्नु भएको छ ।
साथै देशबासीका नाममा सम्बोधन गर्दै उहाँले यस आक्रमणका दोषीलाई कदापि नछोड्ने र उनीहरुलाई जसरी पनि कानुनी कारबाहीको दायरामा ल्याइने आश्वासन दिलाउनुभएको छ ।
आक्रमणकारीको खोजीलाई प्रहरीले राजधानी ब्रसेल्ससहित विभिन्न सहरसम्म नै पुरयाएको छ । हेलिकोप्टरबाट पनि प्रहरीले आक्रमणकारीको खोजी गरिरहेको छ ।