तस्विरः एपी
मस्को, ३ चैत । बुधबार थप रसियाली युद्धक विमानले सिरिया छोडेका छन् । रसियाले सिरियाबाट आफ्नो सेना हटाउने निर्णय गरेसँगै थप विमानले सिरिया छोड्न लागेका हुन् ।
उता अमेरिकी विदेशमन्त्री जोन केरीले रसिया भ्रमणको कार्यक्रम तय गर्नुभएको समाचार छ । त्यस अगावै रसियाले पनि आफ्ना युद्धक विमान फिर्ता गर्ने भएको बताइएको छ ।
रसियासँग सिरियाको युद्धका बारेमा वार्तागर्ने उद्देश्यका साथ उहाँले रसियाको भ्रमण गर्न लाग्नुभएको हो । रसियाली विदेशमन्त्रालयले बुधबार प्रकाशन गरेको विज्ञप्तिमा सो जानकारी दिएको बताइएको छ ।
प्राप्त समाचारअनुसार सिरियाली विभिन्न नगरमा रहेका केही युद्धक विमान बुधबार पनि फिर्ता भएका हुन् । रसियाली राष्ट्रपति भ्लादिमिर पुटिनले मङ्गलबारदेखि रसियाली सेनाले सिरिया छोड्ने घोषणा गर्नुभएको थियो ।
रसियाली सेनाले सिरिया छोड्दा जेनेभामा हुन लागेको शान्ति वार्तालाई सहयोग पुग्ने अनुमानका आधारमा सो निर्णय गरिएको बताइएको हो ।
सिरियाका लागि राष्ट्रसंघीय विशेष दूत स्टेफेन डि मिस्तुराले रसियाले सिरियाबाट आफ्ना सेना फिर्ता लानु भनेको जेनेभा वार्ताका पक्षमा भएको एक महत्वपूर्ण प्रगति हो भन्नुभयो ।
सिरियामा शान्ति स्थापनाका लागि सुरु भएको जेनेभा शान्ति वार्ताकै क्रममा सोमबार अमेरिकी राष्ट्रपति बाराक ओबामा र रसियाली राष्ट्रपति भ्लादिमिर पुटिनबीच पनि टेलिफोन सम्वाद भएको थियो ।
उहाँहरुबीच सिरियाबाट रसियाली सेना हटाउने तथा सिरियामा शान्ति स्थापनाका लागि सुरु भएको जेनेभा वार्ताका बारेमा पनि कुराकानी भएको बताइएको छ ।
वार्तामा सिरियामा जारी रहेको रसियाली सैनिकको गस्ती एवम् उपस्थिति नराखिने र रसियाली सेना त्यहाँबाट हटाउने बारेमा कुराकानी भएको थियो ।
वार्ताका लागि सिरियाली विपक्षीहरुका तर्फबाट भने राष्ट्रपति बसर अल असदले कुनै पनि हालतमा सत्ता छोड्पर्ने अडान अघि सारिएको छ । असदले सत्ता छोड्ने शर्तमा मात्र सिरियाली विपक्षीले वार्तामा बस्ने जनाउँदै आएका छन् ।
सरियामा सन् २०११ बाट सुरु भएको द्वन्द्वमा परी दुई लाख ७० हजारभन्दा बढी व्यक्तिको मृत्यु भएपछि यो द्वन्द्व अन्त्य गर्न अन्तर्राष्ट्रिय दबाब पनि परेको छ ।
जारी द्वन्द्वमा मारिएकामध्ये करिब ८० हजार सर्वसाधारण रहेका छन् । तीमध्ये पनि १३ हजार पाँच सय भने बालबालिकाको सङ्ख्या रहेको छ ।
गएको सेप्टेम्बर महिनाबाट सिरियामा रसियाले सैनिक कारबाही सुरु गरेको हो । यस हमलापछि अमेरिकाले पनि सिरियामा हवाई कारबाही थालेको थियो । तर यतिखेर भने सिरियामा युद्धविराम रहेको छ ।
सरियाको जनसङ्ख्याको कम्तीमा पनि ५० प्रतिशत जनता विस्थापित हुनु परेको र यस मध्यपूर्वी देशलाई निकै ठूलो जनधनको क्षति पुरयाएको यस द्वन्द्वको अन्त्यका लागि सुरु भएको यस वार्ताको पछिल्लो प्रगतिका बारेमा भने केही बताइएको छैन ।
