गोर्खा सत्याग्रहका वहिष्कार कार्यक्रम स्थगन

लन्डन । आफ्नो हक अधिकारका लागि आन्दोलनरत गोरखा सत्याग्रह संयुक्त संघर्ष समितिले बेलायतविरुद्ध केही महिनायता जारी वहिष्कार एवं विरोधका कार्यक्रम स्थगित गर्ने निर्णय गरेको छ ।

समितिले नेपाल र बेलायतबीच दौत्य सम्बन्ध स्थापनाको २०० वर्ष पुरा भएको उपलक्ष्यमा बेलायत सरकारले आयोजना गर्दै आएको हरेक कार्यक्रम वहिष्कार एवं विरोध गर्दै आएको थियो । स्मरण रहोस्, यही १६ डिसेम्बर सांझ बेलायती परराष्ट्र मन्त्रालयमा गरिने द्विशतवार्षिकी समारोहमा भाग लिन नेपाल सरकारको प्रतिनिधित्व गर्दै परराष्ट्र तथा उपप्रधानमन्त्री कमल थापा भोलि १५ डिसेम्बरमा लन्डन आउने कार्यक्रम छ ।

हाल नेपाल रहेका सत्याग्रह समितिका प्रतिनिधिहरुले नेपाल सरकारका विशिष्ठ अधिकारीहरुसंग भेटेपछि स्थगनको निर्णय गरेका हुन् ।सत्याग्रहका प्रतिनिधिहरुले प्रधानमन्त्री केपी शर्मा ओली, परराष्ट्रमन्त्री तथा उपप्रधानमन्त्री कमल थापा र अन्य मन्त्रीहरुसंग भेटेर बेलायत सरकारसंग आफ्ना मागबारे कुरा राखिदिन आग्रह गरेका थिए । वार्तापछि नेपाल सरकारले बेलायतसंग निर्णायक वार्ता गरिदिने  र यसका लागि विरोध कार्यक्रमहरुले वार्ताको वातावरण बिगार्ने भएकाले कार्यक्रम स्थगन गर्न अनुरोध गरेपछि यस्तो निर्णय गरिएको जनाइएको छ ।

समितिले परराष्ट्रमन्त्री एवं परराष्ट्र सचिवलाई भेटेर गोरखा विभेदका लिखित दस्तावेजहरु प्रमाण र तर्कका लागि उपलव्ध गराइसकिएको पनि जनाएको छ ।

समितिले बेलायत सरकारलाई थप दवाव दिने उद्देश्यले सामूहिक आमरण अनसनमा जाने चेतावनी दिइसकेको छ ।