शनिबार, असोज ३ २०७७ | Sat, September 19, 2020
नेपालको समय: २३:३३ | UK Time: 18:48

काँग्रेसद्धारा संविधान संशोधन प्रस्ताव सदनमा पेस गर्न माग

वीनेपाली
२०७२ कार्तिक २२ गते १०:५६

nepali-congress-flag-565x400

काठमाडौँ, २२ कात्तिक । नेपाली काँग्रेस संसदीय दलले आफ्नो दलको नेतृत्वमा रहेको सरकारले मधेस आन्दोलनलाई सम्बोधन गर्न संसद्मा दर्ता गरेको संविधान संशोधनसम्बन्धी प्रस्तावलाई यथाशक्य छिटो सदनमा पेस गर्न सरकारसँग आग्रह गरेको छ ।

मधेस आन्दोलनलाई सम्बोधन गर्ने सन्दर्भमा संविधानमा राज्यका विभिन्न संरचनामा समानुपातिक समावेशी प्रतिनिधित्वको सिद्धान्त, जनसङ्ख्या र भूगोलका आधारमा निर्वाचन क्षेत्र निर्धारण गर्ने गरी संविधान संसोधनसम्बन्धी प्रस्ताव अगाडि बढाइएको थियो ।

काँग्रेस संसदीय दलको आज नयाँ बानेश्वरस्थित व्यवस्थापिका–संसद् भवनमा बसेको बैठकले भूकम्पपीडित जनतालाई राहत दिन भूकम्पबाट प्रभावित संरचनाको पुनःनिर्माण गर्ने सम्बन्धमा व्यवस्था गर्न बनेको विधेयकलाई अघि बढाउनसमेत सरकारको ध्यानाकर्षण गर्ने निर्णय गरेको छ ।

बैठकले भारतका तर्फबाट भइरहेको अघोषित नाकाबन्दीको अन्त्य गर्न सरकारलाई तत्काल कूटनीतिक पहल गरी समस्या समाधान गर्न आफ्नातर्फबाट सबै प्रकारका प्रयत्न गर्ने निर्णय गरेको काँग्रेसका केन्द्रीय सदस्य नरहरि आचार्यले बताए ।

नयाँ संविधान जारी भएसँगै मधेस केन्द्रित दलले गर्दे आएको आन्दोलनलाई स्थगन गरी शान्तिपूर्ण वार्ता र संसदीय प्रक्रियामा आई आफ्ना धारणा राख्न काँग्रेसले सुझाव दिएको छ ।

बैठकपछि पत्रकारलाई प्रतिक्रिया व्यक्त गर्दे काँग्रेसका वरिष्ठ नेता शेरबहादुर देउवाले सरकारको ‘हनिमुन’ समयसम्म नेपाली काँग्रेस रचनात्मक प्रतिपक्षको भूमिकामा रहने बताए ।

प्रतिक्रिया

सम्बन्धित सामाग्री

फेसबुक