मंगलबार, कार्तिक ११ २०७७ | Tue, October 27, 2020
नेपालको समय: ०६:५५ | UK Time: 01:10

चाल्टर्न समाजको भेलामा भलिवल प्रतियोगिता

वीनेपाली
२०७२ असार २१ गते १४:२३
11143575_10206442865184133_8283234316077970349_o

भेलाका सहभागी

 

लन्डन । चाल्टर्न नेपाली समाज यूकेले विगत वर्ष जस्तै यसपटक पनि वार्षिक भेला गरेको छ । आइतबार स्थानीय मेरिडियन स्पोर्टस क्लबको खुला मैदानमा झण्डै तीन सय सहभागीमाझ बीबीक्यू, भलिबल प्रतियोगिता, सांस्कृतिक कार्यक्रमसहित भेला सम्पन्न भएको हो । त्यसबाहेक पहिलोपटक एक जना चर्चित बेलायती जादुगरको प्रस्तुति समेत रहेको यस वर्षको कार्यक्रममा स्थानीय नीम ट्रि फार्मेसीको सहकार्यमा निशुल्क स्वास्थ्य जांच सेवा पनि दिइयो ।

मौसमका कारण निर्धारित भन्दा केहि घण्टा ढिलो सुरु गरिएको कार्यक्रमको पहिलो चरण औपचारिक थियो । जसको अध्यक्षता समाजका अध्यक्ष रोमनाथ पाण्डे र सञ्चालन सचिव टि एन रिजालले गरेका थिए । कार्यक्रममा एनआरएनए यूके अध्यक्ष महेन्द्र कंडेल, नेपालबाट आएका साहित्यकार वियोगी बुढाथोकी लगायत विशिष्ट अतिथी थिए । त्यस अवसरमा समाजका उपाध्यक्ष टंक कंडेलले स्वागत मन्तव्य दिए भने नेपालमा भूकम्प पीडितको सहयोगार्थ समाजले वितरण गरेको सहयोगबारे पत्रकार फणिन्द्र भट्टराईले जानकारी गराए ।
समाजले केहि वर्षदेखि सञ्चालन गरेको लर्न नेपाली प्रोग्रामका स्वयमसेवी शिक्षिकाहरुलाई पनि कार्यक्रममा सम्मान गरिएको थियो ।
भलिबल प्रतियोगितामा लण्डनका विभिन्न ४ टिम सहभागी थिए । जसमध्ये स्थानीय चाल्टर्नकै टोली प्रथम र वेस्ट लण्डन दोस्रो भए । विजेतालाई शिल्ड तथा मेडल प्रदान गरियो ।

अन्तर्राष्ट्रिय अवार्ड विजेता बेलायती जादुगर भिन्स स्पेडको प्रस्तुति बालबालिकासहित सहभागी सबैका लागि मुख्य आकर्षण बनेको थियो ।
कार्यक्रमको दोस्रो चरणमा विभिन्न सांस्कृतिक कार्यक्रम प्रस्तुत गरिएको थियो । मञ्जु भण्डारीले सञ्चालन गरेको उक्त कार्यक्रममा स्थानीय बालबालिका तथा किशोर किशोरीले नृत्य, गीत, कविता आदि प्रस्तुत गरे । कार्यक्रमको अन्त्यमा डिजे हेम विष्टले सहभागी सबै जसोलाई नचाए ।

कार्यक्रमबाट संकलित रकम भूकम्प पीडितका लागि सहयोग गर्ने समाजले बताएको छ । यसअघि समाजले झण्डै ६ लाख रुपैयां बराबरको राहत नेपालमा बांडिसकेको छ । कार्यक्रममा बीबीक्यू तथा खाना ब्यवस्थापन रोयल नेप्लिज रेस्टुरेन्टका प्रोप्राइटर तथा चाल्टर्न समाजका संस्थापक अध्यक्ष सुरज केसीले गरेका थिए ।

प्रतिक्रिया

सम्बन्धित सामाग्री

फेसबुक