लन्डन । तमुधिं दक्षिणपूर्वी लन्डन शाखाले बुद्ध जयन्तीको उपलक्ष्यमा सोमबार चार किमी लामो शान्ति पदयात्रा गरेको छ । बुद्ध पूर्णिमाको अवसरमा ऊलवीच, लन्डन स्थित लोटस् क्लबबाट शुरु पदयात्रा रगलान रोड, ब्रीअरी रोड, ग्रिफिन प्लमस्टिड हुंदै लोटस क्लबमै आएर अन्त्य भएको थियो । बुद्ध जयन्तीको अवसरमा बुद्ध भगवान नेपालमा जन्मेका थिए भन्ने नाराका साथ यस क्षेत्रमा पहिलो पटक विश्व शान्ति पदयात्रा भएको हो । पदयात्राका क्रममा भगवान बुद्धको प्रार्थना तथा बुद्धवाणी अंकित प्लेकार्ड, ब्यानर, झण्डाहरुको रंगीचंगी माहौल देखिन्थ्यो ।
शाखाका अध्यक्ष श्रीचन्द्र गुरुङको अगुवाई र सल्लाहकार सुमलकुमार गुरुङको संयोजनमा सम्पन्न उक्त वृहत र्यालीमा तमुधिं यूके अध्यक्ष रामचन्द्र गुरुङसहित दक्षिण पूर्वी लन्डनमा रहेका विभिन्न संघसंस्थाका प्रतिनिधि सहभागी थिए ।
पदयात्रा शुरु हुनु अघि महासचिव सुमन गुरुङको सम्बोधनमा नेपालमा महाभूकम्पबाट दिवंगत हजारौ व्यक्तिको आत्मा शान्तिका लागि लामा गुरुहरुको प्रार्थना सहित २ मिनटको मौन धारणा गरेर श्रद्धान्जली अर्पण गरिएको थियो । त्यसपछि संयोजक सुमलकुमार गुरुङले विश्व शान्ति पदयात्राका लागि पालन गर्नुपर्ने शान्ति सुरक्षाबारे प्रकाश पारेका थिए ।
पदयात्रा पछि अध्यक्ष श्रीचन्द्र गुरुङले धन्यवाद दिए । आचार्य गुरु, दावा नोर्बु लामा, दावा लामा, गोपाल लामा, धरम लामा तथा विनोद लामा द्वारा तीनघण्टासम्म पूजापाठ तथा प्रवचन पश्चात संक्षिप्त औपचारिक कार्यक्रम सम्पन्न भएको थियो । यस कार्यक्रम महासचिव सुमन गुरुङले सञ्चालन गरेका थिए । उपाध्यक्ष हिराप्रसाद गुरुङको स्वागत मन्तव्य, संयोजक सुमलकुमार गुरुङको बुद्धधर्मबारे छोटो प्रकाश तथा अध्यक्ष श्रीचन्द्र गुरुङको धन्यवाद ज्ञापन पश्चात औपचारिक कार्यक्रम समापन भएको थियो । पूजाको दौरान समाजका सल्लाहकार योगेश गुरुङ तथा सुर्य गुरुङ, कोष संकलनमा ह्यारी गुरुङ तथा जुन गुरुङ आदिले सहयोग गरेका थिए । कर्यक्रममा आमा समूहको अहम् भूमिका थियो । पूजाको अन्तमा लामा गुरुहरुले अभिषेक दिएका थिए ।
ग्रीनवीच बरोका मेट पुलिस सार्जेण्ट बेनको नेतृत्वमा आएका ७ जना प्रहरी तथा इमर्जेन्सी भेहिकल, लन्डन ट्रान्सपोर्टका रेस्क्यू भेहिकल तथा स्टाफहरु, समाजबाट तोकिएका तथा समूह समूहमा नियुक्त गीरएका नियन्त्रक तथा स्टेवार्डहरुको विशेष भूमिकाले कार्यक्रम व्यवस्थित देखिन्थ्यो ।
