आइतबार, असोज ४ २०७७ | Sun, September 20, 2020
नेपालको समय: ०४:२१ | UK Time: 23:36

बक्स न्यु युनिभर्सिटीको अन्तर्राष्ट्रिय विद्यार्थी भर्ना गर्ने लाइसेन्स निलम्बित

वीनेपाली
२०७१ फागुन २५ गते २३:३३
new bucks uni

तस्वीर : विश्वविद्यालयको वेभबाट

 

लण्डन । युकेमा अन्तर्राष्ट्रिय विद्यार्थीमाथि कडाइ गरिँदै गरेको बेला बेलायती गृह मन्त्रालयले बक्स (बर्कसियर) न्यु युनिभर्सिटीको टियर फो स्पोन्सर लाइसेन्स निलम्बन गरेको छ ।
बेलायती गृह मन्त्रालयले आफ्नो वेभसाइटमा आज एक विज्ञप्ति प्रकाशित गरी सो विश्वविद्यालयको विदेशी विद्यार्थी स्पोन्सर गर्ने लाइसेन्स नविकरण नगरिएको जनाएको छ ।
मन्त्रालयले सो निर्णयमाथि पुनरावेदन गर्न विश्वविद्यालयलाई २० दिनको म्याद दिएको छ । यदि सो अवधिमा पनि विश्वविद्यालयले हाइली ट्रष्टेडको मान्यता फिर्ता पाउन नसकेमा सो लाइसेन्स खारेज हुने बताइएको छ ।
यसैगरी विश्वविद्यालयको टियर टु लाइसेन्स पनि निलम्बन गरिएको छ । सो लाइसेन्सबाट विश्वविद्यालयले विदेशबाट कामदार झिकाउन पाउने गर्थ्यो ।
दुवै लाइसेन्स निलम्बन भएसँगै विश्वविद्यालयले अब नयाँ अन्तर्राष्ट्रिय विद्यार्थी र विदेशबाट कामदार स्पोन्सर गर्न पाउने छैन ।
सन् १८१३ मा स्थापित साइन्स एण्ड अार्ट स्कुलले सन् २००७ मा विश्वविद्यालयको मान्यता पाएको हाे । सो विश्वविद्यालयमा अण्डर ग्राजुयट र पोष्ट ग्राजुयट गरी ९ हजार १३० विद्यार्थी अध्ययनरत छन् ।
यसअघि होम अफिसले युनिभर्सिटी अफ वेष्ट लण्डन, लण्डन मेट्रोपोलिटन युनिभर्सिटी, ग्लैण्डर युनिभर्सिटी र बेडफोर्डसियर युनिभर्सिटीको टियर फो स्पोन्सर लाइसेन्स निलम्बन गरेको थियो ।
युकेमा गृह मन्त्रालयले विश्वविद्यालयको विदेशी विद्यार्थी स्पोन्सर गर्न पाउने लाइसेन्स निलम्बन र खारेज गर्नु अब नौलो कुरो रहेन । यस्तै, युके आइसकेका पुराना विद्यार्थीहरु पनि अब पहिले जस्तो विश्वविद्यालयको लाइसेन्स निलम्बन वा खारेज भए के गर्ने कसो गर्ने भन्ने अन्यौलबाट अभ्यस्त हुन थालिसकेको छन् । यद्यपि बक्स न्यु युनिभर्सिटीमा कति नेपाली विद्यार्थी अध्ययनरत छन् भन्ने यकिन भइसकेको छैन ।
युके आइसकेका विद्यार्थीहरुलाई विश्वविद्यालयको लाइसेन्स खारेज हुँदैमा नआत्तिन मन्त्रालयले आग्रह गरेको छ । विश्वविद्यालयको लाइसेन्स निलम्बन भए पनि उनीहरुलाई अध्ययन र काम गर्नमा कुनै समस्या नहुने मन्त्रालयले बताएको छ । यदि विश्वविद्यालयको लाइसेन्स खारेजै भएमा विद्यार्थीहरुलाई सूचित गरिने उसले जनाएको छ ।
सो विश्वविद्यालयमा अध्ययन गर्न युके आउन बाँकी विद्यार्थीहरुको हकमा भने मन्त्रालयले विश्वविद्यालयको लाइसेन्सको टुँगो नलागेसम्म तत्काल युके नआउन पनि सुझाव दिएको छ । विश्वविद्यालयले जारी गरिसकेको कम्फमेसन अफ एसेप्टेन्स फर स्टडिज (कास) र सर्टिफिकेट अफ स्पोन्सरसिप (कोस)का आधारमा गरिएका भिसा आवेदनहरुलाई मन्त्रालयले थाँती राखेको जनाएको छ ।
विश्वविद्यालयको लाइसेन्स निलम्बन हुनअघि जारी कागजातका आधारमा युकेमा बसाइ लम्ब्याउने लगायतका नयाँ निवेदनहरु मन्त्रालयले स्वीकार गर्ने तर त्यसअपर अहिले कुनै कार्यबाही नगर्ने जनाएको छ ।
विश्वविद्यालयको लाइसेन्स निलम्बन भएको अवस्थामा यदि कसैको भिसा सकिँदै छ भने सो विश्वविद्यालले नयाँ स्पोन्सर पत्र जारी गर्न नपाउने भएकाले वैकल्पिक स्पोन्सरहरु खोज्न पनि मन्त्रालयले सुझाएको छ ।
विश्वविद्यालयको लाइसेन्स निलम्बन भएको बखतमा विदेशमा छुट्टी अथवा यात्रारत रहेको भए युके आउनमा कुनै व्यवधान नहुने पनि जनाइएको छ ।

 

प्रतिक्रिया

सम्बन्धित सामाग्री

फेसबुक