लण्डन । गैरआवासीय नेपाली संघ (एनआरएनए) युकेका पूर्व अध्यक्ष सूर्य गुरुङले आफ्नो रेष्टुरेन्टको १६ औँ वर्षगाँठका अवसरमा कास्कीको ल्वाङघलेल स्कुलको पुस्तकालयका लागि ५ लाख सहयोग उठाएका छन् ।
फार्नब्रोमा गोरखा प्यालेस रेष्टुरेन्ट सञ्चालन गर्दै आएका गुरुङले रेष्टुरेन्टको वार्षिकोत्सवका अवसरमा हरेक वर्ष च्यारिटेवल काम गर्दै आएका छन् ।
यसवर्ष फेब्रुअरी २ तारिखमा रेष्टुरेन्टमा आयोजना गरिएको कार्यक्रममा करिब १०० बेलायती ग्राहकहरु सहभागी थिए ।
सो अवसरमा वर्षमा सबैभन्दा धेरै पटक रेष्टुरेन्ट आउने र धेरै खर्च गर्ने ग्राहकहरुलाई रसमुर बोरो काउन्सिलका उपमेयरले उपहार प्रदान गरेका थिए ।
कार्यक्रममा लालीगुराँस ब्याण्डले लाइभ नेपाली गीत संगीत प्रस्तुत गरेको थियो ।
कार्यक्रममा राफल ड्र, बिंगो र लिलाम बढाबढ गरी सो रकम संकलन गरिएको हो ।
सो रकमबाट ल्वाङघलेल स्कुलमा हेल्पनेपाल नेटवर्कले पुस्तकालय बनाउने योजना छ ।
