भूपू गोर्खालाई लन्डनमा बेग्लै आवास गृह

लन्डन । भूपू गोर्खाहरुले बसोवासका लागि लन्डनमा बेग्लै आवास गृह पाउने भएका छन् । स्थानीय समुदाय र भेट्रानहरुको सहयोगका लागि समर्पित ‘स्टोल’ नामक संस्थाले काउन्टेस् अफ वेसेक्स् हाउसमा भूपू गोर्खाहरुलाई उक्त आवास प्रवन्ध गर्न लागेको हो । हाल त्यहां ३६ युनिट उपलव्ध गराइनेछ ।
काउन्टेस् अफ वेसेक्स् हाउसको कम्युनिटी हलमा मार्च २३ मा उक्त नयां आवासगृह उद्घाटन गर्ने कार्यक्रम छ । उद्घाटन समारोहमा स्टोल संरक्षक शाही सदस्य, हन्स्लो मेयर, स्टोल ट्रष्टिज् र अन्य व्यक्तित्वहरुको उपस्थित रहनेछ ।
हन्स्लोस्थित हेनवर्थ पार्क क्षेत्रका उपमेयर विष्णु गुरुङको पहलमा गोर्खाहरुले आवास सुविधा पाएका हुन् । आम फोर्सेस् कम्युनिटीका रिप्रिजेन्टेटिभ काउन्सिलर समेत भएकाले उपमेयर गुरुङलाई आवासका लागि प्रस्ताव लैजान सजिलो भएको थियो । ‘आवासका लागि हरेक शहरबाट भूपू गोर्खाहरुको माग बढिरहेको छ तर धान्न सकिने स्थिति छैन्’, गुरुङले वीनेपालीसंग भने ।
सर ओस्वाल्ड स्टोलले सन् १९१६ मा स्टोल संस्था स्थापना गरेका थिए ।  फुलहाममा १५७ घर बनाएको उक्त संस्थाले वेष्ट लन्डनमा अहिले तीन क्षेत्रमा आवास गृहहरु निर्माण गरिरहेको छ ।