काठमाडौं। यसै साता नामिबियामा सम्पन्न आइसीसी डिभिजन टुमा चौथो स्थानमा चित्त बुझाएको नेपालले विश्व क्रिकेट लिग च्याम्पियनसिप खेल्न पाउने भएको छ। नेपालसँगै तेस्रो भएको केन्याले पनि यो प्रतियोगिता खेल्न पाउने भएको हो। आइसीसीको बुधबार बसेको बैठकले औपचारिकरुपमा नेपाल र केन्याले च्याम्पियनसिप खेल्न पाउने निर्णय गरेको छ। 

डिभिजन एकको शीर्ष स्थानमा रहेका अफगानिस्तान र आयरल्याण्डलाई सन् २०१९ को विश्वकपका लागि र्‍याङ्किङ छनोट सिस्टममा समावेश गरेपछि नेपाल र केन्याले यो प्रतियोगिता खेल्न मौका पाएको हो। यो प्रतियोगिता अफगानिस्तान र आयरल्याण्डले खेल्ने छैन् । प्रतियोगितामा नेपाल र केन्यासँगै हङकङ, नामिबिया, नेदरल्याण्ड, पपुवा न्यूगिनी, स्कटल्याण्ड र युएईसँग रहनेछ।  लिग च्याम्पिनशीप खेलहरु सन् २०१५ को मध्यबाट शुरु हुने छ। दुई वर्षभित्र सबै देशसँग पालौ पालो होम एन्ड अबे म्याच खेल्ने छन् ।