प्रस्ताव निर्माण समितिको बैठक शनिबार

काठमाडौं। विवादबीच संविधानसभाले आइतबार गठन गरेको ‘प्रस्ताव निर्माण समिति’ को पहिलो बैठक शनिबार बस्ने भएको छ। पहिलो बैठक सभाध्यक्षले बोलाउने नियमावलीको व्यवस्थाअनुरूप शनिबार दिउँसो १ बजे समितिको बैठक बोलाइएको हो।  subash-nembang

समितिमा विपक्षी मोर्चाबाट नाम प्राप्त नभए पनि काम नरोकिने बताइएको छ। एमाओवादी नेतृत्वको १९ दलीय मोर्चामा रहेका दलले समितिमा नामावली नदिने बताएका छन्। १९ दलीय मोर्चाले भने सत्तारूढ दल र सभाध्यक्ष नेम्वाङको कदमविरुद्ध आन्दोलन कार्यक्रम घोषणा गरिसकेको छ। उनीहरुले बहुमतीय प्रक्रिया नरोकेसम्म सरकार, सत्तारुढ दल र सभाध्यक्षले बोलाएको कुनै पनि बैठकमा सहभागी नहुने घोषणा गरेका छन्।

समितिको पहिलो बैठकले समितिको प्रक्रिया, सिद्धान्त र विधि तय गर्नेछ। समितिले सभापति चयन नगरेसम्म ज्येष्ठ सदस्यले बैठकको सभापतित्व गर्नेछन् ।

समितिमा सबैभन्दा ज्येष्ठ सदस्य कांग्रेसका कुलबहादुर गुरुङ छन् । उनी विशेष कारणवश अनुपस्थित भए त्यसपछिका अर्का ज्येष्ठ सदस्यले सभापतित्व गर्नेछन् ।

आइतबार बसेको संविधानसभा बैठकमा सभाध्यक्ष नेम्वाङले १९ दलका सभासदको होहल्लाबीच नै ‘प्रस्ताव निर्माण समिति’ गठनका लागि गरेको प्रस्ताव तीन चौथाइ सदस्यले स्वीकृत गरेका थिए । प्रस्ताव समिति ७३ सदस्यीय हुने भए पनि ४९ जनाको मात्र नामावली सार्वजनिक गरिएको छ । बाँकी सदस्य १९ दलका तर्फबाट राखिनेछ।

प्रतिक्रिया

सम्बन्धित सामाग्री