काठमाडौ। करण केसीको बलिङ र पारस खड्काको अलराउन्ड प्रदर्शनमा नेपालले विश्व क्रिकेट लिग डिभिजन-२ मा मंगलबार क्यानाडाविरुद्व ७ विकेटको जीत हासिल गरेको छ। नामिबियामा भैरहेको प्रतियोगितामा टस हारेर फिल्डिङ गरेको नेपालले करणको ५ विकेटको सहयोगमा क्यानाडा ४९ ओभर २ बलमा १ सय १४ रनमा अलआउट गरेको थियो। 
नेपालले २३ ओभर १ बलमा लक्ष्य पुरा गर्दै डिभिजन १ मा उक्लने सम्भावनालाई बलियो बनाएको छ। जीतसँगै नेपाल प्रतियोगियताको अंक तालिकामा दोस्रो स्थानमा उक्लिएको छ। तीन खेल खेलेको नेपालले २ मा जीत र एकमा हार ब्यहोरेको छ।
यसै प्रतियोगिताबाट राष्ट्रिय टोलीमा ‘डेब्यु’ गरेका करण लिस्ट ए मा ५ विकेट लिने पहिलो खेलाडी बनेका छन्। उनले १० ओभरमा २६ रन खर्चेर ५ विकेट लिए। त्यसमा २ ओभर मेडन थियो। सोमपाल कामीले २ तथा पारस, शक्ति गौचन र सागर पुनले १-१ विकेट लिए।
१ सय १५ रनको लक्ष्य प्रतिउत्तर ब्याटिङमा उत्रिएको नेपालले दोस्रो ओभरमा कुनै रन जोड्नु अघि नै ओपनरहरु नरेश बुढाऐर र सुवास खकुरेल गुएको थियो। त्यसपछि ब्याटिङ गर्न आएका पारस र उपकप्तान ज्ञानेन्द्र मल्लले १ सय १४ रनको साझेदारी गर्दै नेपाललाई सहज जीत दिलाएका थिए। पारसले ७७ रन बनाए। उनले ७८ बल खेली ११ चौका र ३ छक्का प्रहार गरे।
उपकप्तान ज्ञानेन्द्र ३२ रनमा अविजित रहे। ५१ बल खेलेका उनले ५ चौका प्रहार गरे । विनोद भण्डारी १ रनमा अविजित रहे। बुधबार नेपालले आयोजक नामिबियासँग खेल्ने छ। नामिबियाले सत प्रतिशत नतिजा निकाल्दै आएको छ।
मंगलबार नै भएको खेलमा आयोजनक नामिबियाले नेदरल्यान्डलाई १ सय ८८ रन र केन्याले युगान्डालाई ५ विकेटले पराजित गरेको छ।
