नेपाली क्रिकेट टोली आज दक्षिण अफ्रिका जाने

काठमाडौं। नेपाली राष्ट्रिय क्रिकेट टोली डिभिजन २ को तयारीका लागि बुधबार दक्षिण अफ्रिका प्रस्थान गर्ने भएको छ। यसअघि शनिबार नै जाने तयारी भएपनि खेलाडीको ट्राभल डकुमेन्ट समयमा बनाउन नसकेका कारण टोली बुधबार मात्रै त्यसतर्फ प्रस्थान गरेको हो।

क्रिसमस र नयाँ वर्ष पर्वको कारण श्रीलंकास्थित दक्षिणी दूतावास बन्द रहेका कारण समयमा नेपाली टोलीको आवश्यक कागजात प्राप्त गर्न ढिलाई भएको थियो। बलर अमृत भट्टराई र नेपाली टोलीका अधिकारीहरु भने शुक्रबार मात्रै दक्षिण अफ्रिका जाने छन्। नेपालले दक्षिण अफ्रिकामा अर्ध व्यवसायिक टोलीसँग तीन वटा अभ्यास खेल खेल्ने छ। डिभिजन २ को खेल हुने नामिबियाको मौसम र पिच दक्षिण अफ्रिकासँग मिल्दोजुल्दो छ।

डिभिजन २ को खेल जनवरी १७ देखि २६ सम्म हुने छ। आइसिसी डिभिजन टु क्रिकेटमा नेपालले पहिलो खेल युगान्डासँग खेल्ने भएको छ। नेपालले युगान्डालाई पराजित गर्दै डिभिजन थ्री च्याम्पियन बनेको हो। राउन्ड रोबिनको आधारमा सञ्चालित हुने प्रतियोगिताको दोस्रो खेलमा नेदरल्यान्डसँग जनवरी १८ मा खेल्ने छ । जनवरी २० का दिन क्यानडा र २१ का दिन आयोजक नामिबियासँग नेपालको खेल छ । नेपालले अन्तिम खेल जनवरी २३ का दिन केन्यासँग खेल्ने छ। प्रतियोगिताको फाइनल र प्लअफ खेलहरु जनवरी २४ मा हुनेछ।