काठमाडौं। भारतीय प्रधानमन्त्री नरेन्द्र मोदीको सार्कको क्रममा हुने भनिएको काठमाडौं बाहिरको सबै कार्यक्रम रद्द भएको छ। भारतीय विदेश मन्त्रालयका प्रवक्ता सइद अकबरुद्दिनले आइतबार बिहान ट्वीट गर्दै सार्कको क्रममा मोदीले काठमाडौंको मात्रै भ्रमण गर्ने जनाएका छन्।
सार्क सम्मेलनको दौरान मोदीले जनकपुर, लुम्बिनी र मुक्तिनाथको भ्रमण गर्ने भनिएको थियो। प्रवक्ता अकबरुद्दिनले देशभित्रैको प्रतिवद्धताको कारणले काठमाडौको मात्रै भ्रमण गर्ने बताएका छन्। उनले नेपाल भारतबीचको विशेष सम्बन्ध प्रसंगको चर्चा गर्दै चाँडै नै अर्को भ्रमणको प्रतिक्षामा रहेको बताएका छन्।
यसअघि भ्रमणको विषयमा मन्त्रीहरुको परस्पर विरोधी धारणा सार्वजनिक हुँदा अन्यौलको अवस्था देखिएको थियो। सरकारले मोदीको भ्रमण हुनसक्ने भन्दै जनकपुर, लुम्बिनी र मुक्तिनाथमा आवश्यक तयारी र सुरक्षाको प्रबन्ध गरेको थियो।
