काठमाडौं। गैर आवासीय नेपाली संघ(एनआरएनए) अध्यक्ष शेष घलेको लगानी रहने पाँच तारे होटलको निर्माण शनिबारबाट शुरु हुने भएको छ।घले प्रवर्द्धक रहेको अस्ट्रेलियाली कम्पनी एमआइटी ग्रुप होल्डिङ्सले ८ अर्ब रुपैया लगानी गर्ने भएको हो । अध्यक्ष घले अस्ट्रेलियाका दुई सय धनीको सूचीमा छन्। 
केशरमहल नजिकै कान्तिपथमा निर्माण गर्न लागिएको होटल शेराटनको शनिबार प्रधानमन्त्री सुशील कोइरालाले शिलान्यास गर्ने छन्। शेराटन हस्पिटालिटी क्षेत्रमा विश्व चर्चित ब्रान्ड हो। विश्वमा विभिन्न देशमा चार सयभन्दा बढि चेन रहेको होटल शेराटनले अपरेशन र व्यवस्थापन हेर्ने छ।
‘होटलको डिजाइन र नक्सा हामीले बनाइसकेका छौ। शिलान्यास भएको दुई वर्ष तीन महिनापछि सञ्चालनमा आउने छ,’ घलेले भने। होटल सन् २०१८ फेब्रुअरीबाट सञ्चालनमा आउने छ। १४ रोपनी क्षेत्रफलमा फैलिएको होटल १७ तल्ले हुने छ। दुई तल्ला पार्किङ बेसमेन्ट र लबी पछि बाँकी रहेको १३ वटा तलामा स्विइटसहित २ सय १३ वटा कोठा हुनेछ ।
