घिमिरे र उपाध्यायको सकुशल रिहाइ माग

लन्डन । नमस्ते युरोप टिभी समूहले कतारमा गिरफ्तार 
आफ्ना सहकर्मी क्यामेराम्यान गुणदेव घिमिरे र मानवअधिकारकर्मी कृष्ण उपाध्यायको सकुशल रिहाइका लागि कतार सरकारसंग माग गरेको छ ।

कतारमा कार्यरत नेपाली श्रमिकको अवस्थाबारे अध्ययन तथा वृत्तचित्र निर्माण गर्न त्यहां गएका ति दुई गत आइतबारदेखि  वेपत्ता छन् ।

समूहले एक विज्ञप्तिमार्फत उनीहरुको अवस्था हालसम्म अज्ञात रहेकोबारे आफ्नो गम्भीर ध्यानाकर्षण भएको जनाउंदै घिमिरे र उपाध्यायलाई कतारी प्रहरीले गिर्फतार गरि यातनासम्म दिएको हुन सक्ने भन्ने विभिन्न समाचार रिपोर्ट र पारिवारिक श्रोतको भनाइले अझ चिन्तित भएको समेत जनाएको छ ।
कतार जस्तो विकसित मुलुकले वृत्तचित्र बनाएकै आधारमा कुनै पनि देशका नागरिकलाई पक्रेर स्थिति अज्ञात बनाउनु कदापी स्वीकार्य नहुने विज्ञप्तिमा छ ।

नमस्ते युरोप टिभी समूहले उनीहरुको जीवनरक्षाका लागि सक्दो पहल गरिदिन बेलायत, नेपाल सरकार र गैर आवासीय नेपाली संघलाई अनुरोध गर्दै उनीहरुको रिहाइका लागि हालसम्म पहल गर्ने ब्रिटिश एवं नेपाली मिडिया, गैर आवासीय नेपाली संघ, शुभचिन्तक तथा सबैमा आभार समेत व्यक्त गरेको छ ।