मंगलबार, मंसिर १६ २०७७ | Tue, December 01, 2020
नेपालको समय: २३:३६ | UK Time: 17:51

बेलायतवासी नेपालीको मन बाढी पीडिततर्फ

वीनेपाली
२०७१ भदौ १० गते १२:४५
दाङको बबई नदीमा आएको बाढीले भत्किएको घरमा बसेर खाना खाँदै गरेका पीडित । तस्बिर साभार ः देवेन्द्र बस्नेत

दाङको बबई नदीमा आएको बाढीले भत्किएको घरमा बसेर खाना खाँदै गरेका पीडित । तस्बिर साभार ः देवेन्द्र बस्नेत

लन्डन । नेपाल यतिखेर प्राकृतिक विपत्तिको चपेटामा छ । मुलुकमा विभिन्न भागमा बाढी पहिरोले धेरै जनधनको क्षति भएको खवर प्राप्त भइरहेका छन् । गत महिना सिन्धुपाल्चोक जिल्लास्थित जुरेमा पहिरो र बाढी पस्दा अझ बढि जनधनको क्षति भयो । मानवीय सहायतामा सरकारले आसा अनुरुप कार्य नगरेपछि प्रवासी नेपालीको मन सहयोगतिर बढेको छ । प्राकृतिक विपत्तिले बेलायतवासी नेपालीको मन समेत पग्लिएर उनीहरु सहयोग जुटाउन तातेका हुन् ।

नेपाल पत्रकार महासंघ बेलायत र हेल्प नेपाल नेटवर्क यूकेद्धारा अघि सारिएको नेपालका बाढी तथा पहिरो पीडितहरुका लागि राहत संकलन कार्य लक्ष्य नजिक पुगेको छ । एक साता अघि महासंघ र हेल्प नेपालले संयुक्त रुपमा बाढी पहिरो पीडितहरुलाई मानवीय सहायताका लागि अपिल गरेपछि सहयोग तीव्र रुपमा संकलन भएको हो ।

https://www.justgiving.com/landslideFarwestNepal र

एसएमएस मार्फत सहयोग संकलन भएको थियो । हालसम्म करिव ७ हजार ६ सय बीस पाउण्ड संलकन भइसकेको छ । ८ हजार पाउण्ड उठाउने लक्ष्य राखी सुरु गरिएको यो कार्य समाचार तयार पार्दासम्म ९५ प्रतिशत पुरा भइसकेको छ । यसमा ३९५ जनाले डोनेशन गरेका छन् ।

‘राम्रो कार्य र राम्रो संसार बनाउने काममा नहिचकिचाई सहयोग गर्नुपर्छ’, नसिव राईले सहयोग गर्दै भनेका छन् । त्यस्तै, युकेश गुरुङले मानवीय कार्यमा सहयोग गर्दैमा कोही गरिव नहुने उल्लेख गरेका छन् । चन्दादाताहरुले बाढीपीडितलाई थोरै रकम भएपनि सहयोग गर्न पाएको भन्दै खुशी समेत व्यक्त गरेका छन् ।

उता, गैर आवासीय नेपाली संघ, बेलायतको पनि सहयोग संकलन कार्य जारी छ । एनआरएनए आइसीसी मानवीय सहायता समितिका सहसंयोजक कुल आचार्यको संयोजकत्वमा बेलायतमा गैर आवासीय नेपालीबाट आर्थिक सहयोग संकलन भइरहेको छ । हाल सम्म करिब चार लाख रुपैयां सहयोग जुटेको र यो कार्य जारी रहेको आचार्यले जनाए । सो रकम एनआरएनए आइसीसी मानवीय सहायता कोषमार्फत पीडित परिवारसमक्ष छिट्टै पुर्याइने छ ।

त्यसैगरि, नेपाली मेला भव्य सफल बनाएको तमुधिं यूकेले सोही अवसरमा आइतबार एकहजार पाउण्ड सुनकोशी बाढी पीडितका लागि दिने घोषणा गरेको छ भने उत्कृष्ट झांकी देखाएर पुरस्कारवापत प्राप्त नगदमा थपी पुन समाज यूकेले सात सय पाउण्ड दिने प्रतिवद्धता व्यक्त गरेको छ ।
व्यक्तिगत र अन्य संघसंस्थाको मानवीय सहायता पनि जारी छ । त्यसवाहेक अमेरिका, क्यानडा, युरोपलगायतबाट पनि सहयोग संकलन भइरहेको जनाइएको छ ।

 

प्रतिक्रिया

सम्बन्धित सामाग्री

फेसबुक