हाच्छिऊँले पार्यो पूर्व गोर्खालाई फन्दामा

लण्डन । खोक्नु, हाइ काड्नु, डकार्नु आममानिसको दिनचर्यामा अति सामान्य कुरा हुन् । दिनमा अनेकौँ पटक दोहोरिने यस्ता कार्य गणना त के सम्झनासम्म गर्न लायक ठानिँदैन । तर कहिलेकाहीँ यस्ता सामान्य बेहोराले पनि जघन्य दुर्घटना गराउँदो रहेछ । हो, यस्तै परिबन्दमा फसेका छन् वेल्समा बसोबासरत् हरिसिंह गुरुङ ।
अति सम्वेदनशील अवस्थामा भएको बखत हाच्छिऊँ आउँदाको परिणतिले ४५ वर्षीय पूर्व गोरखा सैनिक गुरुङलाई अहिले ज्यान मुद्दामा तानेको छ ।
गत जुलाई २० तारिखका दिन वेल्सस्थित मोनमाउथसायरको ए४० राजमार्गमा गुरुङ मोटर कुदाउँदै थिए । अचानक उनलाई हाच्छिऊँ आयो । जसले पेटमा सहनै नसकिने गरी कोपर्यो । त्यही कारण उनले गाडीको सन्तुलन गुमाउन पुगे । जसका कारण सोही समय सोही सडकमा अर्को गाडीमा यात्रारत वृद्ध दम्पत्ति डेभिड मार्शल र मेरीको गाडीसित उनको गाडी ठोक्कियो । त्यही दुर्घटनाका कारण दम्पत्तिको निधन भयो । गुरुङ भने बालबाल बचे ।
अहिले सो घटनामा जोखिमपूर्ण गाडी चलाई ज्यान लिएको र जथाभावी गाडी चलाएको आरोप उनीमाथि लागेको छ । जसलाई उनले अस्वीकार गरेका छन् । सो मुद्दाको न्यू पोर्ट क्राउन कोर्टमा सुनुवाइ शुरु भएको स्थानीय साउथ वेल्स अर्गस पत्रिकाले जनाएको छ ।
सुनुवाईमा बुधबार प्रस्तुत हुँदै गुरुङले भने, “मलाई थाहा छ जतिखेर हाच्छिऊँ आउन शुरु भयो त्यतिबेला म दोस्रो लेनमा थिइनँ । म राम्रोसित सम्झन्छु मेरो दायाँ हात स्टेरिङमा थियो र म गाडीलाई नियन्त्रणमा लिइरहेको थिएँ । मेरो देव्रे हात मेरो पेटमा थियो जसले म मेरो पेटको पीडा नियन्त्रणमा लिन कोसिस गरिरहेको थिएँ ।”
यस्तो खालको हाच्छिऊँबाट आफू यसअघि कहिले पनि पीडित नभएको उनले बताए । “मांसपेशीमा भएको दुखाइका कारण श्वास फेर्न र रक्तसञ्चारमा गाह्रो पारिरहेको थियो । यो असाध्यै पीडादायी थियो” अदालतमा उपस्थित हुँदा उनले भने ।
कार्डिफ विश्वविद्यालयका प्रोफेसर रोनाल्ड एक्लिसको अनुमान छ कि गुरुङले त्यतिबेला चारपटक हाच्छिऊँ गर्दा चलाइरहेको गाडी कम्तीमा १२ सेकेण्ड नियन्त्रण गुमाएको हुनुपर्छ ।
२२ वर्ष गोरखा सैन्यमा बिताएको कम्पनी सार्जेन्ट मेजर गुरुङ अहिले वेल्सको ब्रेकनमा बस्छन् । सेवामा छँदा उनले अफगानिस्तान, इराक, बोस्निया हर्जगोविना, कोसोभोमा सेवा गरेका थिए ।
अदालतमा बयानका क्रममा उनले सो घटनाले आफूलाई अति दुखीत बनाएको बताए । त्यसदिन जे भयो त्यसले आपूmलाई द्रवित बनाएको उनले प्रष्ट्याए । दुर्घटनामा दिवंगत दम्पत्तिका आत्माको शान्तिका लागि उनले प्रार्थना गरे र जीवनभर प्रार्थना गरिरहने बताए ।
हाच्छिऊँले गर्नसक्ने असरका बारेमा विज्ञको राय दिन अदालतमा उपस्थित कार्डिफ विश्वविद्यालयका प्रोफेसर एक्लिसले एक पटकको हाच्छिऊँ तीन सेकेण्ड लामो हुने र एक सेकेण्ड आँखा बन्द हुने बताए । विश्वविद्यालयको कमन कोल्ड सेन्टरका निर्देशक समेत रहेका एक्लिसले अति गम्भीर अवस्थामा हाच्छिऊँ जोखिमपूर्ण हुने धारणा व्यक्त गरे । “धेरैजसो यसले कुनै समस्या ल्याउँदैन तर यदि गम्भीर अवस्थामा भेट्टायो भने खतरनाक परिणति निम्त्याउन सक्छ” उनले भने ।
अदालतमा सो मुद्दामा सुनुवाइ जारी छ ।