सुप्रमा–ईप्रमा अन्तर्राष्ट्रिय पुरस्कार २०२५ डा. श्रीधर खनालको ‘सावर्णि’ उपन्यासलाई

लन्डन । अन्तर्राष्ट्रिय नेपाली साहित्य समाज (अनेसास) बेलायत च्याप्टरद्वारा प्रदान गरिने ‘सुपमा–ईएमए अन्तर्राष्ट्रिय पुरस्कार–२०२५’ यस वर्ष डा. श्रीधर खनालको ‘सावर्णि’ उपन्यासलाई प्रदान गरिने भएको छ।

अनेसासद्वारा मंगलबार प्रकाशित प्रेस विज्ञप्ति अनुसार, ३१ जुलाईमा सार्वजनिक गरिएको उत्कृष्ट १० पुस्तकहरूमध्ये खनालको ‘सावर्णि’ उपन्यासलाई निर्णायक समितिको सर्वसम्मत निर्णयबाट विजेता घोषित गरिएको हो । पुरस्कारको राशि ५ सय पाउण्ड रहेको छ। वि.स २०८१ सालमा एआई र रोबोटिक्समा आधारित उपन्यास ‘सावर्णि’ सार्वजनिक भएको थियो।

संयोजक श्रेष्ठका अनुसार सुप्रमा–ईप्रमा अन्तर्राष्ट्रिय पुरस्कारले नेपाली साहित्यमा उल्लेखनीय योगदान गर्ने साहित्यकारलाई सम्मान गर्दै आएको छ।

पेशाले बालरोग विशेषज्ञ डा. खनाल अस्तित्व फाउन्डेसनका संस्थापकसमेत हुनुहुन्छ । फाउन्डेसनले क्यान्सर जस्ता घातक रोग लागेका बालबालिकाको उपचारमा सहयोग गर्दै आएको छ । ‘सावर्णि’बाट प्राप्त रोयल्टीको केही प्रतिशत रकम डा. खनालले यही फाउन्डेसनमार्फत समाज सेवामा लगाउँदै आएको छ। पुस्तकलाई बुकहिलले बजारमा ल्याएको थियो ।

पुरस्कार यही अगस्ट ९ तारिख लन्डनमा आयोजना गरिने भानु तथा ईश्वर जयन्ती कार्यक्रमका अवसरमा पुरस्कृत गरिने जानकारी पुरस्कार समितिका संयोजक श्रेष्ठले दिनुभएको छ ।