कति तिरे बेलायती प्रधानमन्त्री सुनकले कर ?

लण्डन । बेलायती प्रधानमन्त्री ऋषि सुनकलाई बेलायतका धनी प्रधानमन्त्रीमध्ये एक मानिन्छ । गत शुक्रबार मात्र उनले तिरेको करको फेहरिस्त सार्वजनिक गरेका छन् ।
सार्वजनिक गरिएको तथ्यांकअनुसार उनले सन् २०२२/२३ को आर्थिक वर्षमा कर मात्र ५ लाख पाउण्डभन्दा बढी तिरेका छन् ।
उनले ५ लाख ८ हजार ३०८ पाउण्ड कर तिरेको बताइएको छ । जुन सोभन्दा अघिल्लो वर्षको तुलनामा ७५ हजार पाउण्डले बढी छ ।
गत आर्थिक वर्षमा सुनकले पुँजीगत लाभमात्र १८ लाख पाउण्ड पाएका छन् । अघिल्लो वर्ष उनको पुँजीगत लाभ १६ लाख पाउण्ड रहेको थियो । २ लाख ९३ हजार ४०७ पाउण्ड भने उनले ब्याज र लाभांशवापत पाएका छन् ।
यी सबै आम्दानी उनको अमेरिकामा गरिएको लगानीबाट प्राप्त भएको बताइएको छ ।
यसका साथै प्रधानमन्त्री तथा सांसद भएवापत उनले १ लाख ३९ हजार ४७७ पाउण्ड आम्दानी गरेका छन् ।
उनले आम्दानीको २३ प्रतिशत मात्र करवापत तिरेको बताइएको छ ।
सुनकले भारतीय आइटी कम्पनी इन्फोसिसका संस्थापक नारायण मूर्तिकी छोरी अक्षता मूर्तिसित विवाह गरेका छन् । सुनक दम्पत्तिको सम्पत्ति करिब ५२९ मिलियन पाउण्ड रहेको अनुमान गरिएको छ ।
उता सुनकको मन्त्रिपरिषदमा अर्थमन्त्री रहेका जेरेमी हन्टले भने अघिल्लो आर्थिक वर्षमा ्१ लाख १७ हजार ४१८ पाउण्ड कर तिरेका छन् । उनको कुल आम्दानी ४ लाख १६ हजार ६०५ पाउण्ड रहेको छ ।
प्रमुख प्रतिपक्षी दलका नेता सर किअर स्ट्यामरले भने कर तिरेको सार्वजनिक गर्न बाँकी छ ।