बेलायतमा स्टेट पेन्सन पाउने उमेर ७१ वर्ष बनाउन सुझाव

लण्डन । बेलायतमा स्टेट पेन्सन पाउने उमेर ७१ वर्ष बनाउनुपर्ने एक अध्ययनले सुझाव दिएको छ ।
इन्टरन्याशनल लङ्गिभिटी सेन्टरले १२१ मुलुकमा गरेको अनुसन्धानको नतीजा निकाल्ने क्रममा सो सुझाव दिइएको छ ।
सन् २०५० देखि स्टेट पेन्सन पाउने उमेर ७१ वर्ष नबनाएमा सेवा निवृत्त हुनेहरुको संख्या अधिक हुने र पेन्सन धान्न गाह्रो पर्ने तर्क दिइएको छ ।
सुझावमा बेलायतको वर्तमान सेवा निवृत्त हुने उमेर पर्याप्त नभएको र सन् १९७० पछि जन्मेकाहरुले ७१ वर्ष उमेर नपुगुन्जेलसम्म काम गर्नु पर्ने बताइएको छ ।
हाल बेलायतमा ६६ वर्ष पुगेपछि स्टेट पेन्सनको दाबी गर्न मिल्छ र सन् २०२६ देखि सो उमेर ६७ वर्ष पुर्याइँदैछ भने सन् २०४४ मा ६८ वर्ष पुर्याउने योजना छ ।
स्टेट पेन्सन पाउने उमेर बढाइए पनि उनीहरु सबैले स्वास्थ्यका कारण काम गर्न नसक्ने अवस्था भने चुनौतीपूर्ण रहेको अनुसन्धानमा बताइएको छ । त्यसैले सरकारले जोड स्वास्थ्य सेवामा दिनुपर्ने पनि सिफारिस गरिएको छ ।
गत साता मात्र अफिस फर न्याशनल स्टाटिटिक्सले सन् २०३६ को मध्यसम्ममा बेलायतको जनसंख्या ७३.७ मिलियन पुग्ने अनुमान गरेको छ ।