बेलायतले नविकरण गर्यो ब्रुनाइमा सैनिक राख्ने सम्झौता

लण्डन । बेलायतले ब्रुनाइमा थप पांच वर्ष आफ्नो सेना राख्न दिने भएको छ ।
बेलायत भ्रमणमा आएका ब्रुनाइका सुल्तानसितको भेटमा बेलायतका प्रधानमन्त्री डेविड क्यामरुनले सो सम्बन्धी सम्झौतापत्रमा हस्ताक्षर गरेका छन् ।
दक्षिण एसियामा बेलायती सेनाको स्थायी उपस्थितिलाई कायम राख्न बेलायतले थप पांच वर्ष ब्रुनाइमा बेलायती सेना राख्ने भएको बेलायती प्रधानमन्त्रीको कार्यालयले बताएको छ ।
प्रधानमन्त्री क्यामरुन र ब्रुनाइका सुल्तान हसनल बोल्कियाबीच प्रधानमन्त्री निवासमा वार्ता भएको द टेलिग्राफले जनाएको छ ।
ब्रुनाइमा बेलायती सेना रहँदा उनीहरुलाई कठिन वातावरणमा तालिमको सुविधा पनि उपलब्ध हुने प्रधानमन्त्री कार्यालयले प्रष्ट्याएको छ ।
भेटपछि प्रधानमन्त्री कार्यालयकी प्रवक्ताले भनेकी छिन्, ‘प्रधानमन्त्रीले ब्रुनाइका सुल्तानलाई आफ्नो निवासमा स्वागत गर्नुभयो । उहाँहरुबीच लामो समयदेखि ब्रुनाइमा कायम रहेको बेलायती सेनाको स्टेसनलाई थप पाँच वर्षका लागि नविकरण गर्ने सहमति भएको छ’ उनले भनिन् ।
‘प्रधानमन्त्रीले जोड दिनुभएको छ कि सो ग्यारिजनले दक्षिण एसियामा युकेको सेनाको स्थायी उपस्थिति कायम राख्न र बेलायती सेनालाई अति कठिन वातावरणमा तालिम लिने वातावरण प्रदान गर्नेछ’ उनले अगाडि थपिन् ।
सन् १९६२ देखि ब्रुनाइमा बेलायती सेनाको टुकडी रहँदै आएको छ ।
हालमा करिब २ हजार बेलायती सेना त्यहाँ रहेको बताइएको छ ।
बोर्नियोको सन् १९८४ को स्वतन्त्रतापछि बेलायतले ब्रुनाइमा इन्फेन्ट्री स्टेसन राख्न मञ्जुर गरेको हो । सोअनुसार हरेक पाँच वर्षमा सहमति नविकरण गर्नुपर्ने हुन्छ ।
अहिले ब्रुनाइमा रहेको टुकडीमा फस्ट बटालियन, रोयल गोरखा राइफल्स, ट्रेनिङ टीम ब्रुनाइ छन् । जसले बेलायती सेना र ब्रुनाइको सशस्त्र बललाई तालिम पनि दिने गरेको छ ।
क्यामरुनले भेटका अवसरमा अतिवादी इस्लामिक समूहहरुसितको लडाइँका बारेमा पनि छलफल गरेका थिए ।
ब्रुनाइमा बेलायती सेनाको टुकडीमा गोरखाहरु स्थापनाकालदेखि नै रहँदै आएका छन् । तर ब्रुनाइ सरकारले बेलायत सरकारलाई प्रति सिपाही कति तलव दिन्छ र गोरखाहरुलाई कति दिइन्छ भन्ने बारेमा खुलस्त हुन सकेको छैन् ।
गोरखाहरुले त्यहाँ पनि चरम आर्थिक शोषण हुने गरेको आरोप लगाउने गरेका छन् ।