क्रिसमस मार्केटमा नेपाल प्रवर्धन

लन्डन । मिसेस नेपाल यूके २०१८ की सेकेण्ड रनरअप सबु सेन्चुरीले पहिलोपटक क्रिसमस 
मार्केट सञ्चालन गरि ‘नेपाल भ्रमण वर्ष २०२०’ को प्रवर्धन गरेकी छन् । किङ्सडाउन मेथोडिस्ट चर्च नर्थफिल्डमा गत १४ डिसेम्बरसांझ आयोजित ‘क्रिसमस इभिनिङ मार्केट’ मा स्थानीय व्यापारीका १७ विभिन्न स्टल राखिएका थिए ।

नर्थफिल्डमा सञ्चालित स्पाइस म्याजिक रेष्टुरेन्टकी प्रोप्राइटर सबु एक्लैले ‘देशका लागि केही गरौं’ भन्ने उद्देश्यले सो ‘कन्सेप्ट’ ल्याएको जनाइन् । ‘उक्त हाट बजारमा नेपाल चिनाउने विभिन्न सामाग्री प्रदर्शन, ‘नेपाल भ्रमण वर्ष २०२०’ बारे प्रचार प्रसार र नेपाली कला संस्कृति प्रस्तुत गरियो’- सबुले भनिन् । सो अवसरमा खानाको स्टल पनि राखिएको थियो ।

मिसेस नेपाल यूके २०१८ सेकेण्ड रनरअप भएपछि सबुले समाजसेवामा सक्रियता बढाएकी छन् । उनले गत सेप्टेम्बर अन्तिम साता म्याकमिलन क्यान्सर सपोर्ट यूकेका लागि ‘कफी मर्निङ च्यारिटी’ पनि गरेकी थिइन् । त्यतिबेला उनलाई जय सन्तोषी मां सुन पसल र हार्लिङटन कम्युनिटी सेन्टरले पनि सघाएका थिए ।

उनले यही शुक्रबार २० डिसेम्बरमा साउथ हयारो गोल्डेनसीप रेष्टुरेन्टमा ‘सबुज् १९२० थिम’ नामक क्रिसमस-नयां वर्ष पार्टी समेत आयोजना गरेकी छन् । आफ्ना सहयोगी, साथीभाइ र शुभचिन्तकबीच क्रिसमस एवं अंग्रेजी नयां वर्षको शुभकामना आदानप्रदान र मनोरन्जनका लागि पार्टी आयोजना गरिएको उनको भनाइ छ ।