लन्डन । खेलकुद विकास र कल्याणकारी कार्यमा क्रियाशिल बेलायतस्थित एउटा नेपाली संस्था सहारा यूके हयाम्पसायर एफए इक्वेलिटी च्याम्पियन अवार्ड प्राप्त गर्न सफल भएको छ ।
गत २ जुन शनिबार सांझ साउथहयाम्पटन एफसी कन्फरेन्स हलमा आयोजित विशेष समारोहमा सहारा यूकेलाई हयाम्पसायर एफएले इक्वेलिटी च्याम्पियन अवार्ड प्रदान गरेको हो ।
कार्यक्रममा हयाम्पसायर एफएका क्रिस स्मिथले सहारा यूके अध्यक्ष मिन बहादुर गुरुङ (साईंला) लाई उक्त अवार्ड प्रदान गरे ।
स्मरणरहोस्, सहारा यूके अध्यक्ष गुरुङ ‘हयाम्पसायर इन्क्लुसिभ एडभाइजरी ग्रुप’ मा छन् । अवार्ड कार्यक्रममा सहारा यूकेका संस्थापक अध्यक्ष नवीन गुरुङ, एफसी चेयरमेन कुसाङ गुरुङ, महासचिव कृष्ण गुरुङ, धनु थकाली सहभागी थिए ।
अवार्ड प्राप्त गरेपछि अध्यक्ष गुरुङले सबैप्रति आभार व्यक्त गर्दै सबैको योगदानले यस अवार्ड मिलेको बताए ।
पछिल्लो समयमा सहारा यूकेले एफएसंग सम्वन्ध विस्तार गर्दै गएको छ । यही निकट सम्वन्धका कारण एफएले नेपालीहरुको सबैभन्दा वृहत गोर्खा कपका बेला एफए कप प्रदर्शन गर्न मैदानमै कप ल्याएको थियो । गोर्खा कप हेर्न एफए पदाधिकारी पनि सहभागी थिए ।
एफएले भविष्यमा सहारा यूके खेलाडीलाई प्रशिक्षण, रेफ्री तालिम र अन्य लजिस्टिक सहयोग गर्ने योजना बनाएको अध्यक्ष गुरुङले जनाए ।
