बेलायतलाई गोर्खा स्मारक हस्तान्तरण

लन्डन । गोर्खाहरुको आधुनिक युद्ध इतिहास बोकेको बेलायत फोकस्टनस्थित गोर्खा मेमोरियल स्मारक स्थानीय सरकारलाई हस्तान्तरण गरिएको छ । निर्माण भएको तीन वर्षपछि गोर्खा मेमोरियल फण्डले शनिबार स्थानीय फोकस्टन टाउन काउन्सिललाई स्मारक हस्तान्तरण गरेको हो ।

फोकस्टन टाउन मेयर आन बेरी र गोर्खा मेमोरियल फण्डका संस्थापक अध्यक्ष पूर्व काउन्सिलर धन गुरुङबीच एउटा एमओयू हस्ताक्षरपछि स्मारक अब काउन्सिलको जिम्मामा गएको छ ।

‘बेलायत सरकारलाई समस्त गोर्खाहरुका तर्फबाट उपहार हो यो’, गुरुङले भने, ‘यसबाट बेलायतले गोर्खाहरुप्रति 
हेर्ने दृष्टिकोण र विश्वास अझ बढ्ने मेरो आशा छ ।’
स्मारकको नियमित मर्मत सम्भार र अन्य व्यवस्थापन गर्न फण्डलाई सकस पनि भइरहेको थियो ।

गुरुङले काउन्सिलर छंदै सन् २००९ तिर स्मारक निर्माण 
प्रोजेक्टको योजना बनाएका थिए । विभिन्न चन्दादाताहरुको करिब एक करोड रुपैयां सहयोगमा सन् २०१५ मा स्मारक बनेको थियो । बेलायती सेनामा गोर्खा भर्तीको दुई सय वर्ष गांठको अवसर पारेर ब्रिटिश अभिनेत्री जोआना लुम्ली र कांग्रेस नेतृ सुजाता कोइरालाले उक्त स्मारक उद्घाटन गरेका थिए ।

स्मारकमा अफगानिस्तान र अन्य देशका द्वन्द्वमा वीर गति 
प्राप्त गरेका १५ जना दिवंगत गोर्खाहरुको नाम अंकित छ । यसमा गोर्खा इतिहास पनि समावेश छ । स्मारकले नेपाली नयां पुस्ता र बेलायती नागरिकलाई गोर्खा इतिहास र योगदानबारे थप प्रष्टयाउने विश्वास लिइएको छ ।

गोर्खा मेमोरियल फण्डका संस्थापक गुरुङले आफ्नो संस्थाले बेलायतस्थित गोर्खा समुदाय र मातृभूमिका लागि कल्याणकारी काम गर्दै आएको जनाए । फण्डले हालै झापाको काकडभिट्टा माविमा ३१ कम्युटरसहित आइटी सेन्टर स्थापना गरिदिएको छ भने आगामी वर्षसम्म 
रोल्पाको खाबाङ गाउंस्थित श्री बलभद्र माविमा त्यस्तै सेन्टर स्थापना गर्ने उद्देश्य राखेको छ ।

संस्थाको प्राकृतिक विपत्ति सचेतना कार्यक्रम अन्तर्गत नेपालमा अग्नी नियन्त्रण सम्वन्धि प्रशिक्षण र सामाग्री साथै एम्बुलेन्स उपलव्ध गराइएको पनि गुरुङले जानकारी दिए ।